azmat-e-adam

ham tumheñ qatl hī kar deñge magar aaj kī raat

mat kaho beTī bahū aur bahan

tum to ho ek hasīñ mashġhala-e-aish-o-nishāt

aaj tak dekhī na thī jis kī jhalak

gorā gorā sā bharā jism gudāz

jis ne armānoñ meñ ik aag lagā rakkhī hai

siskiyāñ band karo aur bilaknā chhoḌo

apne vāvailā se ab aur munaġhġhis na karo

chhoḌ do apne azīzoñ kā ḳhayāl

jin meñ nāmūs pe kaT marne kī himmat hī na thī

bhaag nikle haiñ jo jiine kī tamannā le kar

bhuul jaao ki kabhī un se bhī nisbat thī tumheñ

sūrmāoñ se milo un kī ye azmat samjho

mahfil-e-aish ko haañ aur munaġhġhaz na karo

ye navāzish nahīñ kuchh kam ki chunā hai ham ne

tumheñ is mahfil-e-ishrat ko sajāne ke liye

do ghaḌī rañg jamāne ke liye

poñchh lo aañsū phirā lo āñkheñ

laash bachche kī nahīñ ye to hai zillat kā nishāñ

kaise insānoñ se nisbat thī tumheñ

ham ne to rahm se ḳhāmosh kiyā hai us ko

varna ham ye bhī to kar sakte the

haath aur pair qalam kar ke use taḌpāte

ek ik boTī uḌāte tumheñ dukh pahuñchāte

tum to ḳhush-baḳht ho aayā nahīñ yuuñ taish hameñ

ye to manzūr thā ḳhalal-e-aish hameñ

jaam par jaam uThātī huī do saath abhī

chhoḌ do ab ye taḌap aur phaḌak

is tarah rukte bhī haiñ baḌhte hue haath kabhī

aaj kī raat faqat aaj kī raat

ek pal kā bhī ta.ammul hameñ manzūr nahīñ

varna kuchh duur nahīñ

apnī sañgat ke liye paas bulā leñ tum ko

sāmne chhat se jo laTkī haiñ tumhārī bahneñ

chhātiyāñ jin kī haiñ pairoñ meñ paḌī

aur jismoñ meñ khube haiñ bhāle

apne baḌhte hue hāthoñ ke jhaTakne kī sazā

ye dahakte hue bhāle bhī haiñ añgāre bhī

aur rassī kī jagah ye haiñ tumhārī zulfeñ

aaj kī raat magar aaj raat

ek pal kā bhī ta.ammul hameñ manzūr nahīñ

muskurāo baḌho aur jaam uThāo

shām-e-ġham kaisī hai ab sub.h-e-masarrat ban jaao

ham tumheñ qatl hī kar deñge tumhārī ḳhātir

taaki nāmard zalīl aur kamīne vo aziiz

bhaag nikle haiñ jo jiine kī tamannā le kar

dekh paa.eñ to na ye kah ke tumheñ sharmā.eñ

apne haañ beTī bahū koī na thī koī na thī

haañ jo is naam kī laḌkī thī vo mar khap bhī ga.ī

aur tumhāre vo aziiz

in kī izzat bhī rahe aan bhī baaqī rah jaa.e

jin ke hisse meñ na ġhairat hai na maut

ham tumheñ qatl hī kar deñge magar aaj kī raat

hum tumhein qatl hi kar denge magar aaj ki raat

mat kaho beTi bahu aur bahan

tum to ho ek hasin mashghala-e-aish-o-nishat

aaj tak dekhi na thi jis ki jhalak

gora gora sa bhara jism gudaz

jis ne armanon mein ek aag laga rakkhi hai

siskiyan band karo aur bilakna chhoDo

apne wawaila se ab aur munaghghis na karo

chhoD do apne azizon ka KHayal

jin mein namus pe kaT marne ki himmat hi na thi

bhag nikle hain jo jine ki tamanna le kar

bhul jao ki kabhi un se bhi nisbat thi tumhein

surmaon se milo un ki ye azmat samjho

mahfil-e-aish ko han aur munaghghaz na karo

ye nawazish nahin kuchh kam ki chuna hai hum ne

tumhein is mahfil-e-ishrat ko sajaane ke liye

do ghaDi rang jamane ke liye

ponchh lo aansu phira lo aankhen

lash bachche ki nahin ye to hai zillat ka nishan

kaise insanon se nisbat thi tumhein

hum ne to rahm se KHamosh kiya hai us ko

warna hum ye bhi to kar sakte the

hath aur pair qalam kar ke use taDpate

ek ek boTi uDate tumhein dukh pahunchate

tum to KHush-baKHt ho aaya nahin yun taish hamein

ye to manzur tha KHalal-e-aish hamein

jam par jam uThati hui do sath abhi

chhoD do ab ye taDap aur phaDak

is tarah rukte bhi hain baDhte hue hath kabhi

aaj ki raat faqat aaj ki raat

ek pal ka bhi tammul hamein manzur nahin

warna kuchh dur nahin

apni sangat ke liye pas bula len tum ko

samne chhat se jo laTki hain tumhaari bahnen

chhatiyan jin ki hain pairon mein paDi

aur jismon mein khube hain bhaale

apne baDhte hue hathon ke jhaTakne ki saza

ye dahakte hue bhaale bhi hain angare bhi

aur rassi ki jagah ye hain tumhaari zulfen

aaj ki raat magar aaj raat

ek pal ka bhi tammul hamein manzur nahin

muskurao baDho aur jam uThao

sham-e-gham kaisi hai ab subh-e-masarrat ban jao

hum tumhein qatl hi kar denge tumhaari KHatir

taki namard zalil aur kamine wo aziz

bhag nikle hain jo jine ki tamanna le kar

dekh paen to na ye kah ke tumhein sharmaen

apne han beTi bahu koi na thi koi na thi

han jo is nam ki laDki thi wo mar khap bhi gai

aur tumhaare wo aziz

in ki izzat bhi rahe aan bhi baqi rah jae

jin ke hisse mein na ghairat hai na maut

hum tumhein qatl hi kar denge magar aaj ki raat