b amman se KHitab

ai ki terī zaat thī sarmāya-e-ilm-o-amal

ai ki terā har irāda thā nihāyat hī aTal

ai ki tū ik jauhar-e-teġh-e-dil-e-islām thī

terī hastī yādgār-e-raunaq-e-ayyām thī

tere siine meñ bharā thā bahr-e-islāmī kā josh

tere a.azā meñ ravāñ thā ek dariyā-e-ḳharosh

terī rag rag meñ vafūr-e-joshish-e-sailāb thā

terā har jazba ziyā-e-gauhar-e-nāyāb thā

terī hastī sham.a-e-himmat ke liye ā.īna thī

zindagī terī charāġh-e-millat-e-derīna thī

tū ne murda zindagī meñ ruuh taaza phūñk dī

himmat-e-majbūr ko baḳhshī hai tū ne zindagī

ek shuā-e-nayyar-e-āsūda-e-rif.at thī tū

is ḳhizān-e-zīst meñ ik mādar-e-millat thī tū

tū ne ramz-e-qalb-e-maḳhfī āshkārā kar diye

ma.anī-e-ilm-o-amal parda se be-parda kiye

mudda.ā-e-dil tirā ik gauhar-e-ummīd hai

jo fazā-e-tār meñ ik sho.ala-e-ḳhurshīd hai

terā har lamha munavvar har ghaḌī nayyar-ba-dosh

zindagī terī rahe misl-e-charāġh-e-zau-farosh

zulmat-e-millat meñ chamkā.e munavvar āftāb

gulshan-e-ummīd meñ mahkā diye rangīñ gulāb

imtihān-e-zīst meñ tū kis qadar hī kāmyāb

har varaq terī kitāb-e-umr kā hai ḳhud kitāb

aa sukūt-e-yās meñ mujh ko banā le rāz-dār

aa rah-e-ummīd meñ mujh ko banā le kāmgār

aa mire kānoñ meñ bhī vo rūh-e-pinhāñ phūñk de

zindagī merī bhī ik maazī kā ā.īna bane

aa 'jamāl'-e-zār ko bhī rāzdār-e-dil banā

zindagī is kī bhī ik barq-e-dil-e-bismil banā

ai ki teri zat thi sarmaya-e-ilm-o-amal

ai ki tera har irada tha nihayat hi aTal

ai ki tu ek jauhar-e-tegh-e-dil-e-islam thi

teri hasti yaadgar-e-raunaq-e-ayyam thi

tere sine mein bhara tha bahr-e-islami ka josh

tere aaza mein rawan tha ek dariya-e-KHarosh

teri rag rag mein wafur-e-joshish-e-sailab tha

tera har jazba ziya-e-gauhar-e-nayab tha

teri hasti shama-e-himmat ke liye aaina thi

zindagi teri charagh-e-millat-e-derina thi

tu ne murda zindagi mein ruh taza phunk di

himmat-e-majbur ko baKHshi hai tu ne zindagi

ek shua-e-nayyar-e-asuda-e-rifat thi tu

is KHizan-e-zist mein ek madar-e-millat thi tu

tu ne ramz-e-qalb-e-maKHfi aashkara kar diye

mani-e-ilm-o-amal parda se be-parda kiye

muddaa-e-dil tera ek gauhar-e-ummid hai

jo faza-e-tar mein ek shoala-e-KHurshid hai

tera har lamha munawwar har ghaDi nayyar-ba-dosh

zindagi teri rahe misl-e-charagh-e-zau-farosh

zulmat-e-millat mein chamkae munawwar aaftab

gulshan-e-ummid mein mahka diye rangin gulab

imtihan-e-zist mein tu kis qadar hi kaamyab

har waraq teri kitab-e-umr ka hai KHud kitab

aa sukut-e-yas mein mujh ko bana le raaz-dar

aa rah-e-ummid mein mujh ko bana le kaamgar

aa mere kanon mein bhi wo ruh-e-pinhan phunk de

zindagi meri bhi ek mazi ka aaina bane

aa 'jamal'-e-zar ko bhi raazdar-e-dil bana

zindagi is ki bhi ek barq-e-dil-e-bismil bana