بی اماں سے خطاب

اے کہ تیری ذات تھی سرمایۂ علم و عمل

اے کہ تیرا ہر ارادہ تھا نہایت ہی اٹل

اے کہ تو اک جوہر تیغ دل اسلام تھی

تیری ہستی یادگار رونق ایام تھی

تیرے سینہ میں بھرا تھا بحر اسلامی کا جوش

تیرے اعضا میں رواں تھا ایک دریائے خروش

تیری رگ رگ میں وفور جوشش سیلاب تھا

تیرا ہر جذبہ ضیائے گوہر نایاب تھا

تیری ہستی شمع ہمت کے لیے آئینہ تھی

زندگی تیری چراغ ملت دیرینہ تھی

تو نے مردہ زندگی میں روح تازہ پھونک دی

ہمت مجبور کو بخشی ہے تو نے زندگی

ایک شعاع نیر آسودۂ رفعت تھی تو

اس خزان زیست میں اک مادر ملت تھی تو

تو نے رمز قلب مخفی آشکارا کر دئے

معنیٔ علم و عمل پردہ سے بے پردہ کئے

مدعائے دل ترا اک گوہر امید ہے

جو فضائے تار میں اک شعلۂ خورشید ہے

تیرا ہر لمحہ منور ہر گھڑی نیر بہ دوش

زندگی تیری رہے مثل چراغ ضو فروش

ظلمت ملت میں چمکائے منور آفتاب

گلشن امید میں مہکا دئے رنگیں گلاب

امتحان زیست میں تو کس قدر ہی کامیاب

ہر ورق تیری کتاب عمر کا ہے خود کتاب

آ سکوت یاس میں مجھ کو بنا لے راز دار

آ رہ امید میں مجھ کو بنا لے کامگار

آ مرے کانوں میں بھی وہ روح پنہاں پھونک دے

زندگی میری بھی اک ماضی کا آئینہ بنے

آ جمالؔ زار کو بھی راز دار دل بنا

زندگی اس کی بھی اک برق دل بسمل بنا