ba-shart-e-ustuwari

ḳhūn-e-jamhūr meñ bhīge hue parcham le kar

mujh se afrād kī shāhī ne vafā māñgī hai

sub.h ke nuur pe ta.azīr lagāne ke liye

shab kī sañgīn siyāhī ne vafā māñgī hai

aur ye chāhā hai ki maiñ qāfila-e-ādam ko

Tokne vaalī nigāhoñ kā madad-gār banūñ

jis tasavvur se charāġhāñ hai sar-e-jāda-e-zīst

us tasavvur kī hazīmat kā gunahgār banūñ

zulm parvarda qavānīn ke aivānoñ se

beḌiyāñ taktī haiñ zanjīr sadā detī hai

tāq-e-tādīb se insāf ke but ghūrte haiñ

masnad-e-adl se shamshīr sadā detī hai

lekin ai azmat-e-insāñ ke sunahre ḳhvābo

maiñ kisī taaj kī satvat kā parastār nahīñ

mere afkār kā unvān-e-irādat tum ho

maiñ tumhārā huuñ luTeroñ kā vafādār nahīñ

KHun-e-jamhur mein bhige hue parcham le kar

mujh se afrad ki shahi ne wafa mangi hai

subh ke nur pe tazir lagane ke liye

shab ki sangin siyahi ne wafa mangi hai

aur ye chaha hai ki main qafila-e-adam ko

Tokne wali nigahon ka madad-gar banun

jis tasawwur se charaghan hai sar-e-jada-e-zist

us tasawwur ki hazimat ka gunahgar banun

zulm parwarda qawanin ke aiwanon se

beDiyan takti hain zanjir sada deti hai

taq-e-tadib se insaf ke but ghurte hain

masnad-e-adl se shamshir sada deti hai

lekin ai azmat-e-insan ke sunahre KHwabo

main kisi taj ki satwat ka parastar nahin

mere afkar ka unwan-e-iradat tum ho

main tumhaara hun luTeron ka wafadar nahin