ba-izzat tariqe se jine ke jatan

guzashta all-parties-conference meñ

tai huā thā

ki shahr bhar kī tārīkī

aañkh ke bosīda piyāloñ meñ uñDel kar

sub.h, dopahar, shaam bā-qā.edgī se istimāl kī jaa.e

to añdheroñ meñ jūtiyāñ TaTolnā

sahal ho jā.egā

kaun nañge paañv mahal kī taraf jaa.e

ki rāste meñ uchakkoñ ke ḳhauf se

kāñch kī zamīn bichhā dī ga.ī hai

hamāre ehtajājī banners zor-dār havā chalne ke baa.is

hamāre saroñ pe ulaT paḌe

aur ubhre hue gūmḌoñ ko tārīkī ne chhupā liyā

is ke bāvajūd hamārī āñkheñ

añdhere meñ dekh saktī haiñ

dekh saktī haiñ ki daa.eñ baa.eñ rahne vāloñ ne

āñkhoñ ko badan meñ ġhair-zarūrī samjhā

aur mahal vāloñ ko atiyya kar diiñ

agar is baras bairūnī gāhakoñ kī āmad-o-raft

mahdūd rahī to ain mumkin hai

hamārī jūtiyāñ hamāre saroñ se utaar kar

pairoñ meñ pahnā dī jaa.eñ

guzashta all-parties-conference mein

tai hua tha

ki shahr bhar ki tariki

aankh ke bosida piyalon mein unDel kar

subh, dopahar, sham ba-qaedgi se istimal ki jae

to andheron mein jutiyan TaTolna

sahal ho jaega

kaun nange panw mahal ki taraf jae

ki raste mein uchakkon ke KHauf se

kanch ki zamin bichha di gai hai

hamare ehtajaji banners zor-dar hawa chalne ke bais

hamare saron pe ulaT paDe

aur ubhre hue gumDon ko tariki ne chhupa liya

is ke bawajud hamari aankhen

andhere mein dekh sakti hain

dekh sakti hain ki daen baen rahne walon ne

aankhon ko badan mein ghair-zaruri samjha

aur mahal walon ko atiyya kar din

agar is baras bairuni gahakon ki aamad-o-raft

mahdud rahi to ain mumkin hai

hamari jutiyan hamare saron se utar kar

pairon mein pahna di jaen