baba kutta bhi rota raha

baabā maiñ bahut roī thī

mujh saat baras kī nā-samajh bachchī ko

kutte aur insān ke farq kā kyā pata thā

maiñ to apnī copy par mohabbat ke qalam se

insān kī tasvīr banātī thī

aur kutte kī tasvīr banāte banāte

nafrat ḳhud-baḳhud dil meñ umañD aatī thī

lekin

aaj jab meñ ghar se schōl kī taraf

nikal paḌī to

rāste par

kutte aur insān kā sāmnā huā

kutte ko dekh kar maiñ to Dar hī ga.ī

aur insān kī taraf bhāgī

lekin

mujhe tab ehsās huā ki

jis kutte se maiñ nafrat kartī thī

us kī āñkhoñ meñ mere liye mohabbat

ubhar aa.ī hai

kyūñki

darinde ne jab mujhe ghasīT kar

jhāḌiyoñ ke pīchhe

apnī nafrat kā nivāla banā liyā

aur

mere gulābī jism ko

apne zahrīle panjoñ se

reza reza karne lagā

zahrīlī ḳharāsh jūñhī

gulābī jism ko paara paara kartī huī

jigar ko chiir ga.ī

to āḳhirī hichkī ke saath hī baabā

mujhe mahsūs huā ki

insān kī haivāniyat dekh kar

vo be-zabān kuttā bhī

rote rote

insāniyat kā mātam manā rahā hai

baba main bahut roi thi

mujh sat baras ki na-samajh bachchi ko

kutte aur insan ke farq ka kya pata tha

main to apni copy par mohabbat ke qalam se

insan ki taswir banati thi

aur kutte ki taswir banate banate

nafrat KHud-baKHud dil mein umanD aati thi

lekin

aaj jab mein ghar se school ki taraf

nikal paDi to

raste par

kutte aur insan ka samna hua

kutte ko dekh kar main to Dar hi gai

aur insan ki taraf bhagi

lekin

mujhe tab ehsas hua ki

jis kutte se main nafrat karti thi

us ki aankhon mein mere liye mohabbat

ubhar aai hai

kyunki

darinde ne jab mujhe ghasiT kar

jhaDiyon ke pichhe

apni nafrat ka niwala bana liya

aur

mere gulabi jism ko

apne zahrile panjon se

reza reza karne laga

zahrili KHarash junhi

gulabi jism ko para para karti hui

jigar ko chir gai

to aaKHiri hichki ke sath hi baba

mujhe mahsus hua ki

insan ki haiwaniyat dekh kar

wo be-zaban kutta bhi

rote rote

insaniyat ka matam mana raha hai