babul jaisa ek saya

maañ

tere āñchal ke saare phuul chune maiñ ne

maañ tere kangan ke saare giit sune maiñ ne

maañ apnī palkoñ par tere ḳhvāb bune maiñ ne

bhīgī bhīgī purvā.ī

yā narm narm resham sī dulā.ī

yā māthe par jagmag būñdeñ

malmal oḌhne vaalī ghaḌiyāñ

maañ

har rut meñ

terī sāñsoñ kī vo madhur mahkār mirī rag-rag meñ utrī

maañ terī vo bulbul sī chahkār mirī rag-rag meñ utrī

nīle-pīle sho.aloñ par paktī ik handī

garm tave par Dalī huī missī kī roTī

miTTī kī kulhiyā meñ hare dhaniye kī chaTnī

aslī ghī meñ baghriī maash kī daal kī ḳhushbū

bhare hue aalū ke parāThe

mirchoñ vaale dahī-pakauḌe

bāvarchī-ḳhāne meñ sajī bartan kī qatāreñ

rassī par phailā.e hue kuchh ujle kapḌe

maañ

tere hāthoñ ke saare

hunar mire hāthoñ meñ utre

terā salīqa

terā sughaḌ-pan

terī vo phūloñ sī hañsī aur mamtā kā madh-mātā saaya

maañ

maiñ ne to

jab se hosh sañbhālā tujhe ḳhud apne andar paayā

tujhe hī apne andar le kar

āñkhoñ meñ kuchh ḳhvāb sajā.e

ik din maiñ us anjānī dahlīz pe utrī

āñgan meñ phir

jhāñjhar vaalā paañv dharā nath pahnī darpan dekhā

aur ḳhush ho ho kar ye sochā

maiñ to tujhe apne andar le kar aa.ī huuñ

lekin ye ma.alūm nahīñ thā

maiñ ne is āñgan meñ abhī jis ko dekhā thā

maiñ ne is kamre meñ abhī jis ko paayā thā

tū vo nahīñ thī

tere sivā maañ saath mire koī aur aaya thā

haañ maañ vo to bābul jaisā ik saaya thā

jis ke ghar aate hī aksar

tū sochoñ meñ kho jaatī thī

kuchh gum-sum sī ho jaatī thī

yā bistar meñ so jaatī thī

maañ terī vo soch to ab merā hissa hai

ham donoñ kā ek hī jaisā to qissa hai

man

tere aanchal ke sare phul chune main ne

man tere kangan ke sare git sune main ne

man apni palkon par tere KHwab bune main ne

bhigi bhigi purwai

ya narm narm resham si dulai

ya mathe par jagmag bunden

malmal oDhne wali ghaDiyan

man

har rut mein

teri sanson ki wo madhur mahkar meri rag-rag mein utri

man teri wo bulbul si chahkar meri rag-rag mein utri

nile-pile shoalon par pakti ek handi

garm tawe par Dali hui missi ki roTi

miTTi ki kulhiya mein hare dhaniye ki chaTni

asli ghi mein baghrii mash ki dal ki KHushbu

bhare hue aalu ke paraThe

mirchon wale dahi-pakauDe

bawarchi-KHane mein saji bartan ki qataren

rassi par phailae hue kuchh ujle kapDe

man

tere hathon ke sare

hunar mere hathon mein utre

tera saliqa

tera sughaD-pan

teri wo phulon si hansi aur mamta ka madh-mata saya

man

main ne to

jab se hosh sanbhaala tujhe KHud apne andar paya

tujhe hi apne andar le kar

aankhon mein kuchh KHwab sajae

ek din main us anjaani dahliz pe utri

aangan mein phir

jhanjhar wala panw dhara nath pahni darpan dekha

aur KHush ho ho kar ye socha

main to tujhe apne andar le kar aai hun

lekin ye malum nahin tha

main ne is aangan mein abhi jis ko dekha tha

main ne is kamre mein abhi jis ko paya tha

tu wo nahin thi

tere siwa man sath mere koi aur aaya tha

han man wo to babul jaisa ek saya tha

jis ke ghar aate hi aksar

tu sochon mein kho jati thi

kuchh gum-sum si ho jati thi

ya bistar mein so jati thi

man teri wo soch to ab mera hissa hai

hum donon ka ek hi jaisa to qissa hai