baad ke baad

sahīfe utarne se pahle aur nabiyoñ ke nuzūl ke ba.ad

haath se gire hue nivāloñ kī tarah hameñ kuttoñ ke aage Daal diyā jaatā rahā

is darmiyān, āñkhoñ ke nīche ham ne apne haath rakhe

ki vo paaoñ par na gir paḌeñ aur kāñch kā e'tibār jaatā rahe

mujhe aag se likh aur paanī se ugā

miTTī ke saath insāf maiñ ḳhud karūñgī

vo to qadam qadam kāñToñ kī baaḌ tak ḳhud chal kar ga.e

aag pahnāvā karte the jo log

aur jo akelā thā us ne sargoshī ījād kī

aur jis ne qabīla chāhā us ne chīḳheñ banā.īñ aur raat ke parindoñ meñ baañT diiñ

pardesī hue haath kūñjeñ pakaḌte rah ga.e

havā kā bichhaunā judā.ī kī uñgliyoñ ne bunā aur mohabbat karne vaale dil ne sameTā

kyā paañv jūtoñ ke liye bane the yā manziloñ ke liye?

phir thakan ne kis ke paañv toḌe

aur kaun asiir kiyā ki us se jūtoñ kī qīmat pūchhe aur insān ke bhaav batā.e

phir e'tibār ne kis ke Taḳhne kaaTe ki vo āsmān samet zamīn par aa rahe

ḳhudāvand! bhiil qabīle ke log gosht khānā kab sīkhe

jab un ke muñh ko ḳhuun aur dil ko ḳhauf-e-ḳhudā lag gayā

phir is ke ba.ad vo sar na uThā sake

āzādī sirf ek ThanDī saañs thī maqdūr-bhar

aur ġhulāmī! umr bhar kī roTiyāñ!!

sahife utarne se pahle aur nabiyon ke nuzul ke baad

hath se gire hue niwalon ki tarah hamein kutton ke aage Dal diya jata raha

is darmiyan, aankhon ke niche hum ne apne hath rakhe

ki wo paon par na gir paDen aur kanch ka e'tibar jata rahe

mujhe aag se likh aur pani se uga

miTTi ke sath insaf main KHud karungi

wo to qadam qadam kanTon ki baD tak KHud chal kar gae

aag pahnawa karte the jo log

aur jo akela tha us ne sargoshi ijad ki

aur jis ne qabila chaha us ne chiKHen banain aur raat ke parindon mein banT din

pardesi hue hath kunjen pakaDte rah gae

hawa ka bichhauna judai ki ungliyon ne buna aur mohabbat karne wale dil ne sameTa

kya panw juton ke liye bane the ya manzilon ke liye?

phir thakan ne kis ke panw toDe

aur kaun asir kiya ki us se juton ki qimat puchhe aur insan ke bhaw batae

phir e'tibar ne kis ke TaKHne kaTe ki wo aasman samet zamin par aa rahe

KHudawand! bhil qabile ke log gosht khana kab sikhe

jab un ke munh ko KHun aur dil ko KHauf-e-KHuda lag gaya

phir is ke baad wo sar na uTha sake

aazadi sirf ek ThanDi sans thi maqdur-bhar

aur ghulami! umr bhar ki roTiyan!!