baadal

chalo itnā to ho paayā

ki tum ne bādaloñ ke chand TukḌoñ ko hamāre paas bhejā hai

hamārī pyaas kī ḳhātir zarā sī aas bhejī hai

chaTaḳhte aur pyāse niile hoñToñ ko tasavvur meñ

ḳhayāloñ meñ kisī be-vasl aur be-mausmī ġham kī namī kā narm giilā aur gulābī sā koī ehsās to hogā

jise maiñ ne duā kī shāḳh se bāñdhā huā hai ab

badan meñ kuchh tirī utre sisakte aur tapte dasht meñ uḌtī taḌaptī sar paTaktī ret kā ehsās miT jaa.e

so aisā ho gayā ab

pahāḌoñ kī sī sañglāḳhī ḳhamoshī aur māyūsī ḳharāshoñ kī aziyyat miT chukī hai

tire bheje hue bādal ko chhūne se

chalo itnā to ho paayā

chalo itna to ho paya

ki tum ne baadalon ke chand TukDon ko hamare pas bheja hai

hamari pyas ki KHatir zara si aas bheji hai

chaTaKHte aur pyase nile honTon ko tasawwur mein

KHayalon mein kisi be-wasl aur be-mausmi gham ki nami ka narm gila aur gulabi sa koi ehsas to hoga

jise main ne dua ki shaKH se bandha hua hai ab

badan mein kuchh teri utre sisakte aur tapte dasht mein uDti taDapti sar paTakti ret ka ehsas miT jae

so aisa ho gaya ab

pahaDon ki si sanglaKHi KHamoshi aur mayusi KHarashon ki aziyyat miT chuki hai

tere bheje hue baadal ko chhune se

chalo itna to ho paya