baraat ka ghoDa

ḳhudā

tū ne mujhe ghoḌā banāyā to

magar bārāt kā

jis ke aage nāchte rahte haiñ log

note dāñtoñ meñ dabā.e

kyā nazar meñ haiñ tirī vo zulm

jo mujh par hue haiñ is karam kī aaḌ meñ

race ke maidān ke badle

kisī manDap talak kā ye safar

kitnā thakā detā hai mujh ko

kyā tujhe mā'lūm hai

kyā tujhe mā'lūm hai dūlhe kā bojh

us ko baiThāne kī zimmedāriyāñ

aur us par is qadar hassās dil

jo samajh saktā hai is din ke ma'ānī kyā haiñ dūlhe ke liye

koī kaisā bhī paTāḳha chhoḌ de pairoñ meñ mere

shor se baaje ke mere kaan bhī phaT jaa.eñ to kyā

chaal meñ apnī zarā sā farq maiñ aane na dūñgā

piiTh par baiThe hue dūlhe kī 'izzat merī 'izzat

haañ magar ye bhī ḳhayāl aatā hai aksar

maiñ to har zillat uThā kar

apnī zimmedāriyāñ puurī karūñgā aur kartā aa rahā huuñ

tū magar kab is tarah sochegā us maḳhlūq ke baare meñ

jo terī amaañ meñ hai

KHuda

tu ne mujhe ghoDa banaya to

magar baraat ka

jis ke aage nachte rahte hain log

note danton mein dabae

kya nazar mein hain teri wo zulm

jo mujh par hue hain is karam ki aaD mein

race ke maidan ke badle

kisi manDap talak ka ye safar

kitna thaka deta hai mujh ko

kya tujhe ma'lum hai

kya tujhe ma'lum hai dulhe ka bojh

us ko baiThane ki zimmedariyan

aur us par is qadar hassas dil

jo samajh sakta hai is din ke ma'ani kya hain dulhe ke liye

koi kaisa bhi paTaKHa chhoD de pairon mein mere

shor se baje ke mere kan bhi phaT jaen to kya

chaal mein apni zara sa farq main aane na dunga

piTh par baiThe hue dulhe ki 'izzat meri 'izzat

han magar ye bhi KHayal aata hai aksar

main to har zillat uTha kar

apni zimmedariyan puri karunga aur karta aa raha hun

tu magar kab is tarah sochega us maKHluq ke bare mein

jo teri aman mein hai