barish dekhti hai

bārish dekhtī hai ki use kahāñ barasnā hai

aur dhuup jāntī hai ki use kahāñ nahīñ jaanā

magar vo jaatī hai aur shikār hotī hai

aur kāñToñ meñ phañs kar baT jaatī hai

aur ret ke zarroñ kī tarah

zamīn se uThā.ī nahīñ jaatī

raat samajhtī hai aur samajh kar ḳhāmosh rahtī hai

sirf apne konoñ par girheñ lagātī rahtī hai

aur kahtī hai

aa mil Dholan yaar kadī

kedāre ke tāne-bāne meñ

dekh to maiñ ne kyā bunā hai

ek phūlban! ek rās-ban

aur ab

dhāre dhāre chalī jaatī huuñ maiñ

ban biich utrūñ, kāñTe rañg duuñ?

dhāre dhāre bahī jaatī huuñ

aur bhed nahīñ paatī huuñ

na pal chhan kā

na yugoñ yugoñ ke antar kā

tum sundar gyānī shānt hue

mohe apnī siit karo svāmī

sab chiḌiyāñ ik sañg boltī haiñ

mohe apnī siit karo svāmī aur duur kahīñ uḌ jaatī haiñ

maiñ apne har ik kone par chālīs girheñ lagvātī huuñ

tan joñk joñk Dasvātī huuñ

aur dhuup ko ye ma.alūm nahīñ

kab mujh par saaya karnā hai! kab mujh ko raushan karnā hai

kab merī ḳhaak uḌānī hai

kab mere añg añg bharnā hai

maiñ gaThrī giile kapḌoñ kī

kis ghaaT mujhe ab dharnā hai!

barish dekhti hai ki use kahan barasna hai

aur dhup jaanti hai ki use kahan nahin jaana

magar wo jati hai aur shikar hoti hai

aur kanTon mein phans kar baT jati hai

aur ret ke zarron ki tarah

zamin se uThai nahin jati

raat samajhti hai aur samajh kar KHamosh rahti hai

sirf apne konon par girhen lagati rahti hai

aur kahti hai

aa mil Dholan yar kadi

kedare ke tane-bane mein

dekh to main ne kya buna hai

ek phulban! ek ras-ban

aur ab

dhaare dhaare chali jati hun main

ban bich utrun, kanTe rang dun?

dhaare dhaare bahi jati hun

aur bhed nahin pati hun

na pal chhan ka

na yugon yugon ke antar ka

tum sundar gyani shant hue

mohe apni sit karo swami

sab chiDiyan ek sang bolti hain

mohe apni sit karo swami aur dur kahin uD jati hain

main apne har ek kone par chaalis girhen lagwati hun

tan jonk jonk Daswati hun

aur dhup ko ye malum nahin

kab mujh par saya karna hai! kab mujh ko raushan karna hai

kab meri KHak uDani hai

kab mere ang ang bharna hai

main gaThri gile kapDon ki

kis ghaT mujhe ab dharna hai!