barish ka pahla qatra

ghanghor ghaTā tulī khaḌī thī

par buuñd abhī nahīñ paḌī thī

har qatra ke dil meñ thā ye ḳhatra

nāchīz huuñ maiñ ġharīb qatra

tar mujh se kisī kā lab na hogā

maiñ aur kī guuñ na aap jogā

kyā khet kī maiñ bujhā.ūñgā pyaas

apnā hī karūñgā satyānās

ḳhālī hāthoñ se kyā saḳhāvat

phīkī bātoñ meñ kyā halāvat

kis birte pe maiñ karūñ dilerī

maiñ kaun huuñ kyā bisāt merī

har qatra ke dil meñ thā yahī ġham

sargoshiyāñ ho rahī thiiñ bāham

khichḌī sī ghaTā meñ pak rahī thī

kuchh kuchh bijlī chamak rahī thī

ik qatra ki thā baḌā dilāvar

himmat ke muhīt kā shanāvar

faiyyaz o javvād o nek-niyyat

bhaḌkī us kī rag-e-hamiyyat

bolā lalkār kar ki aao!

mere pīchhe qadam baḌhāo

kar guzro jo ho sake kuchh ehsān

Daalo murda zamīn meñ jaan

yāro! ye hachar-machar kahāñ tak

apnī sī karo bane jahāñ tak

mil kar jo karoge jāñ-fishānī

maidān pe pher doge paanī

kahtā huuñ ye sab se barmalā maiñ

aate ho to aao lo chalā maiñ

ye kah ke vo ho gayā ravāna

''dushvār hai jī pe khel jānā''

har-chand ki thā vo be-bizā.at

kī us ne magar baḌī shujā.at

dekhī jur.at jo us sakhī kī

do-chār ne aur pairvī kī

phir ek ke ba.ad ek lapkā

qatra qatra zamīñ pe Tapkā

āḳhir qatroñ kā bañdh gayā taar

bārish lagī hone moslā-dhār

paanī paanī huā bayābāñ

sairāb hue chaman ḳhayābāñ

thī qaht se pā.emāl ḳhilqat

is meñh se huī nihāl ḳhilqat

jur.at qatra kī kar ga.ī kaam

baaqī hai jahāñ meñ aaj tak naam

ai sāhibo! qaum kī ḳhabar lo

qatroñ kā sā ittifāq kar lo

qatroñ hī se hogī nahr jaarī

chal nikleñgī kashtiyāñ tumhārī

ghanghor ghaTa tuli khaDi thi

par bund abhi nahin paDi thi

har qatra ke dil mein tha ye KHatra

nachiz hun main gharib qatra

tar mujh se kisi ka lab na hoga

main aur ki gun na aap joga

kya khet ki main bujhaunga pyas

apna hi karunga satyanas

KHali hathon se kya saKHawat

phiki baaton mein kya halawat

kis birte pe main karun dileri

main kaun hun kya bisat meri

har qatra ke dil mein tha yahi gham

sargoshiyan ho rahi thin baham

khichDi si ghaTa mein pak rahi thi

kuchh kuchh bijli chamak rahi thi

ek qatra ki tha baDa dilawar

himmat ke muhit ka shanawar

faiyyaz o jawwad o nek-niyyat

bhaDki us ki rag-e-hamiyyat

bola lalkar kar ki aao!

mere pichhe qadam baDhao

kar guzro jo ho sake kuchh ehsan

Dalo murda zamin mein jaan

yaro! ye hachar-machar kahan tak

apni si karo bane jahan tak

mil kar jo karoge jaan-fishani

maidan pe pher doge pani

kahta hun ye sab se barmala main

aate ho to aao lo chala main

ye kah ke wo ho gaya rawana

dushwar hai ji pe khel jaana

har-chand ki tha wo be-bizaat

ki us ne magar baDi shujaat

dekhi jurat jo us sakhi ki

do-chaar ne aur pairwi ki

phir ek ke baad ek lapka

qatra qatra zamin pe Tapka

aaKHir qatron ka bandh gaya tar

barish lagi hone mosla-dhaar

pani pani hua bayaban

sairab hue chaman KHayaban

thi qaht se paemal KHilqat

is meinh se hui nihaal KHilqat

jurat qatra ki kar gai kaam

baqi hai jahan mein aaj tak nam

ai sahibo! qaum ki KHabar lo

qatron ka sa ittifaq kar lo

qatron hi se hogi nahr jari

chal niklengi kashtiyan tumhaari