baz-did

tum jo aao to dhundalke meñ lapaT kar aao

phir vahī kaif sar-e-shām liye

jab larazte haiñ sadāoñ ke simaTte saa.e

aur āñhkeñ ḳhalish-e-hasrat-e-nākām liye

har guzarte hue lamhe ko takā kartī haiñ

ḳhud-farebī se ham-āġhosh rahā kartī haiñ

tum jo aao to añdhere meñ lapaT kar aao

shabnamī shīshoñ ko sahlā.eñ lachaktī shāḳheñ

aur mahtāb-e-zamistāñ koī paiġhām liye

yuuñ chalā aa.e ki dar baaz na ho

koī āvāz na ho

tum jo aao to ujāle meñ lapaT kar aao

phir vahī lazzat-e-anjām liye

jab tamannā.eñ kisī ḳhauf se chīḳh uThtī haiñ

aur ḳhāmoshī-e-lab saikḌoñ ib.hām liye

ek sañgīn haqīqat meñ badal jaatī hai

zindagī dard meñ Dhal jaatī hai

tum jo aao to dhundalke mein lapaT kar aao

phir wahi kaif sar-e-sham liye

jab larazte hain sadaon ke simaTte sae

aur aanhken KHalish-e-hasrat-e-nakaam liye

har guzarte hue lamhe ko taka karti hain

KHud-farebi se ham-aghosh raha karti hain

tum jo aao to andhere mein lapaT kar aao

shabnami shishon ko sahlaen lachakti shaKHen

aur mahtab-e-zamistan koi paigham liye

yun chala aae ki dar baz na ho

koi aawaz na ho

tum jo aao to ujale mein lapaT kar aao

phir wahi lazzat-e-anjam liye

jab tamannaen kisi KHauf se chiKH uThti hain

aur KHamoshi-e-lab saikDon ibham liye

ek sangin haqiqat mein badal jati hai

zindagi dard mein Dhal jati hai