baz did

vo sūraj kī pahlī kiran le ke apne gharoñ se chale jab

to chehre gulāboñ kī sūrat khile the

jabīnoñ pe sajdoñ kī tābindagī thī

libāsoñ kī shā.istagī zeb-e-tan thī

nigāhoñ meñ shauq-e-safar kī chamak

aur qadmoñ meñ thī ābshāroñ kī mastī

mujhe yuuñ lagā zindagī

āsmānoñ pe gaayā huā giit dohrā rahī hai

sar-e-shām sūraj kī Dhaltī kiran

saath apne liye jab gharoñ ko vo lauTe

to chehroñ kī laalī

libāsoñ kī shā.istagī mar chukī thī

nigāhoñ meñ gahrī thakan thī

jo qadmoñ se Takrā rahī thī

mujhe yuuñ lagā zindagī

phir gunāhoñ kī pādāsh meñ

āsmāñ kī hadoñ se nikālī ga.ī hai

wo suraj ki pahli kiran le ke apne gharon se chale jab

to chehre gulabon ki surat khile the

jabinon pe sajdon ki tabindagi thi

libason ki shaistagi zeb-e-tan thi

nigahon mein shauq-e-safar ki chamak

aur qadmon mein thi aabshaaron ki masti

mujhe yun laga zindagi

aasmanon pe gaya hua git dohra rahi hai

sar-e-sham suraj ki Dhalti kiran

sath apne liye jab gharon ko wo lauTe

to chehron ki lali

libason ki shaistagi mar chuki thi

nigahon mein gahri thakan thi

jo qadmon se Takra rahi thi

mujhe yun laga zindagi

phir gunahon ki padash mein

aasman ki hadon se nikali gai hai