bazar

is qadar shoḳh nigāhoñ se na dekho mujh ko

ġhairat-e-husn pe ilzām na aa jaa.e kahīñ

tum ne ḳhud bhī nahīñ samjhā hai abhī tak jis ko

lab pe vo ḳhvāhish be-nām na aa jaa.e kahīñ

ye jo ma.asūm tamannā hai tumhāre dil meñ

kitnī sañgīn ḳhatā hai ye tumheñ kyā mālūm

aur duniyā meñ mohabbat ke ḳhatā-kāroñ par

kis qadar zulm huā hai ye tumheñ kyā mālūm

apnī bosīda rivāyāt ke vīrānoñ meñ

tishna rūhoñ ko bhaTakte nahīñ dekhā tum ne

apnī tahzīb ke tārīk sitam-ḳhānoñ meñ

ārzūoñ ko sisakte nahīñ dekhā tum ne

kitnī lāsheñ haiñ pas-e-madfan-e-nāmūs yahāñ

apne ajdād kī tārīḳh uThā kar dekho

zīnat-ḳhāna jo be-rūh sī tasvīreñ haiñ

chīḳh uTTheñgī zarā haath lagā kar dekho

apnī duniyā to tijārat kī vo manDī hai jahāñ

jism kī baat hī kyā ruuh bhī bik jaatī hai

daam lag jaa.eñ to kyā ishva-o-andāz-o-adā

pyaar sī shai sar-e-bāzār chalī aatī hai

tum ko bhī ek na ik din yūñhī biknā hogā

apne nāmūs kī derīna rivāyat ke liye

koī tājir tumheñ bāzār se le jā.egā

apnī bāñhoñ meñ ghaḌī bhar kī harārat ke liye

lauT jaao ki yahāñ pyaar kā hāsil kyā hai

nāla-e-shab ke sivā āh-e-sahar dam ke sivā

aur kyā degā zamāna tumheñ in.ām-e-vafā

ātish-e-ġham ke sivā dīda-pur-nam ke sivā

is qadar shoKH nigahon se na dekho mujh ko

ghairat-e-husn pe ilzam na aa jae kahin

tum ne KHud bhi nahin samjha hai abhi tak jis ko

lab pe wo KHwahish be-nam na aa jae kahin

ye jo masum tamanna hai tumhaare dil mein

kitni sangin KHata hai ye tumhein kya malum

aur duniya mein mohabbat ke KHata-karon par

kis qadar zulm hua hai ye tumhein kya malum

apni bosida riwayat ke viranon mein

tishna ruhon ko bhaTakte nahin dekha tum ne

apni tahzib ke tarik sitam-KHanon mein

aarzuon ko sisakte nahin dekha tum ne

kitni lashen hain pas-e-madfan-e-namus yahan

apne ajdad ki tariKH uTha kar dekho

zinat-KHana jo be-ruh si taswiren hain

chiKH uTThengi zara hath laga kar dekho

apni duniya to tijarat ki wo manDi hai jahan

jism ki baat hi kya ruh bhi bik jati hai

dam lag jaen to kya ishwa-o-andaz-o-ada

pyar si shai sar-e-bazar chali aati hai

tum ko bhi ek na ek din yunhi bikna hoga

apne namus ki derina riwayat ke liye

koi tajir tumhein bazar se le jaega

apni banhon mein ghaDi bhar ki hararat ke liye

lauT jao ki yahan pyar ka hasil kya hai

nala-e-shab ke siwa aah-e-sahar dam ke siwa

aur kya dega zamana tumhein inam-e-wafa

aatish-e-gham ke siwa dida-pur-nam ke siwa