bazyaft

kisī kābūs kā goyā gazīda

shikasta ḳhvāb-e-be-ta.abīr ko āñkhoñ se dho kar

ġharībī DhūñDhne niklā savere

to hairānī ko dāman-gīr paayā

guzargāhoñ meñ lashkar be-amāñ the

chahakte chahchahāte naunihālāñ

jhuke jaate the pushtāroñ ke maare

unheñ kuchh bhī nahīñ mā'lūm mahshar

kamīñ-gāhoñ meñ un kā muntazir hai

ḳhudāyā āgahī āḳhir kidhar hai

to maiñ gard-e-kudūrat muñh pe mal ke

ġharībī DhūñDhne niklā thā ghar se

siyah-kāroñ kī kāroñ ke tavīle

mire raste ko har jānib se roke

salīb-e-dūd par mujh ko chaḌhā.e

chale jaate the nādīda jahāñ meñ

jahāñ duniyā-e-ġham-nā-āshnāyāñ

sajīle ḳhush-nigār-o-sīm-tan haiñ

sar-e-rāhe phaTe lattoñ ke ḳheme

vahīñ atrāf meñ bachchoñ ke revaḌ

vahīñ mailī kuchailī aurteñ bhī

sar-e-bāzār mardoñ ke barābar

musāvāt-e-tamaddun kā namūna

unheñ kuchh bhī nahīñ mā'lūm

ġhurbat kyā balā hai

ki zer-e-āsmāñ jo kuchh hai

sab un kā jahāñ hai

bil-āḳhir thak thakā kar ghar ko lauTā

ThiThak kar apnī chaukhaT par jo Thahrā

to us ke paar ik vīrāñ sī duniyā

ujāle meñ fareb-e-shab ke Duubī

ġharībī ko kaleje se lagā.e

mirī aamad kī jaise muntazir thī

vahīñ gulshan duā ke nā-farīda

vahīñ pazhmurda ummīdoñ kī kaliyāñ

vahīñ dānishvarī sar-dar-garebāñ

garebāñ chaak apnā sī rahī thī

vahīñ fikr-e-rasā bhī ro rahī thī

kisi kabus ka goya gazida

shikasta KHwab-e-be-tabir ko aankhon se dho kar

gharibi DhunDhne nikla sawere

to hairani ko daman-gir paya

guzargahon mein lashkar be-aman the

chahakte chahchahate naunihaalan

jhuke jate the pushtaron ke mare

unhen kuchh bhi nahin ma'lum mahshar

kamin-gahon mein un ka muntazir hai

KHudaya aagahi aaKHir kidhar hai

to main gard-e-kudurat munh pe mal ke

gharibi DhunDhne nikla tha ghar se

siyah-karon ki karon ke tawile

mere raste ko har jaanib se roke

salib-e-dud par mujh ko chaDhae

chale jate the nadida jahan mein

jahan duniya-e-gham-na-ashnayan

sajile KHush-nigar-o-sim-tan hain

sar-e-rahe phaTe latton ke KHeme

wahin atraf mein bachchon ke rewaD

wahin maili kuchaili aurten bhi

sar-e-bazar mardon ke barabar

musawat-e-tamaddun ka namuna

unhen kuchh bhi nahin ma'lum

ghurbat kya bala hai

ki zer-e-asman jo kuchh hai

sab un ka jahan hai

bil-aKHir thak thaka kar ghar ko lauTa

ThiThak kar apni chaukhaT par jo Thahra

to us ke par ek viran si duniya

ujale mein fareb-e-shab ke Dubi

gharibi ko kaleje se lagae

meri aamad ki jaise muntazir thi

wahin gulshan dua ke na-farida

wahin pazhmurda ummidon ki kaliyan

wahin danishwari sar-dar-gareban

gareban chaak apna si rahi thi

wahin fikr-e-rasa bhi ro rahi thi