bazyaft

guzre hue maah o saal ke ġham

tanhā.ī shab meñ jaag uTThe haiñ

umr-e-rafta kī justujū meñ

ashkoñ ke charāġh jal rahe haiñ

āsā.ish-e-zindagī kī hasrat

maazī kā naqsh ban chukī hai

hālāt kī nā-guzīr talḳhī

ek ek nafas meñ bas ga.ī hai

nākāmi-e-ārzū ko dil ne

taslīm o razā ke naam baḳhshe

milne kī ḳhushī bichhaḌne kā ġham

kyā kyā the fareb-e-zindagī ke

ik umr meñ ab samajh sake haiñ

ḳhushiyoñ kā fusūñ gurez pā hai

ab tark duā kī manzileñ haiñ

dāmān-e-talab simaT chukā hai

nākāmī-e-shauq miTte miTte

jiine kā shu.ūr de ga.ī hai

ye ġham hai navā.e shab kā hāsil

ye dard matā-e-zindagī hai

ujḌī huī har ravish chaman kī

detī hai surāġh rañg o bū kā

vīrān haiñ zindagī kī rāheñ

raushan hai charāġh aarzū kā

guzre hue mah o sal ke gham

tanhai shab mein jag uTThe hain

umr-e-rafta ki justuju mein

ashkon ke charagh jal rahe hain

aasaish-e-zindagi ki hasrat

mazi ka naqsh ban chuki hai

haalat ki na-guzir talKHi

ek ek nafas mein bas gai hai

nakaami-e-arzu ko dil ne

taslim o raza ke nam baKHshe

milne ki KHushi bichhaDne ka gham

kya kya the fareb-e-zindagi ke

ek umr mein ab samajh sake hain

KHushiyon ka fusun gurez pa hai

ab tark dua ki manzilen hain

daman-e-talab simaT chuka hai

nakaami-e-shauq miTte miTte

jine ka shuur de gai hai

ye gham hai nawae shab ka hasil

ye dard mata-e-zindagi hai

ujDi hui har rawish chaman ki

deti hai suragh rang o bu ka

viran hain zindagi ki rahen

raushan hai charagh aarzu ka