babin tafawut-e-rah

ajab thā hind-e-pārīna kā vo qānūn bhī jis meñ

jo koī mard āvāra

kisī aurat ko sandal zevarāt-e-jauhar-o-zar pairahan maalā sharāb irsāl kartā to

zinā kī ek sūrat mānte the is amal ko bhī

kiye jaate the jis par bhārī jurmāne

ta.ashshuq ġhair kī biivī se paiġhām us ko bhijvānā

aur us se chheḌ us kā pairahan chhūnā

kisī aurat kī sohbat meñ akele meñ machal jaanā

falātūnī vafā kī aarzū karnā

aur āñkhoñ ke ishāroñ se rasīlī guftugū karnā

kisī tālāb meñ us kī ma.iyyat meñ nahānā bhī

bahalnā muskurānā bhī

zinā kī sūrateñ thiiñ sab

kiye jaate the jurmāne hamesha in jarā.em par

ajab kirdār kī pākīzgī kā vo tasavvur thā

ki jis meñ itnī bandish thī

ajab thā vo shi.ār apnā

aur ab āzādgī lahrā rahī hai be-ḳhatar ho kar

koī bandish nahīñ ḳhvāhish kī laġhzish par

ġhazab hai ye shi.ār apnā

ajab tha hind-e-parina ka wo qanun bhi jis mein

jo koi mard aawara

kisi aurat ko sandal zewaraat-e-jauhar-o-zar pairahan mala sharab irsal karta to

zina ki ek surat mante the is amal ko bhi

kiye jate the jis par bhaari jurmane

tashshuq ghair ki biwi se paigham us ko bhijwana

aur us se chheD us ka pairahan chhuna

kisi aurat ki sohbat mein akele mein machal jaana

falatuni wafa ki aarzu karna

aur aankhon ke ishaaron se rasili guftugu karna

kisi talab mein us ki maiyyat mein nahana bhi

bahalna muskurana bhi

zina ki suraten thin sab

kiye jate the jurmane hamesha in jaraem par

ajab kirdar ki pakizgi ka wo tasawwur tha

ki jis mein itni bandish thi

ajab tha wo shiar apna

aur ab aazadgi lahra rahi hai be-KHatar ho kar

koi bandish nahin KHwahish ki laghzish par

ghazab hai ye shiar apna