bachche ki hasrat

ḳhudā detā hameñ bhī par to sū-e-asmāñ jaate

parindoñ kī tarah uḌ kar yahāñ se ham vahāñ jaate

kabhī is Daal par rahte kabhī us Daal par jaate

daraḳhtoñ se kabhī uḌ kar kisī chhat par utar jaate

safar ke vāste muhtāj gaaḌī ke na ham hote

na nazroñ meñ kisī bhī rāste ke pech-o-ḳham hote

na hotī koī pābandī na hotī fikr sarhad kī

na koī roktā ham ko na lagtī paañv meñ beḌī

parindoñ kī tarah hote agar āzād duniyā meñ

nazar kyoñ Dālte ham par kabhī sayyād duniyā meñ

KHuda deta hamein bhi par to su-e-asman jate

parindon ki tarah uD kar yahan se hum wahan jate

kabhi is Dal par rahte kabhi us Dal par jate

daraKHton se kabhi uD kar kisi chhat par utar jate

safar ke waste muhtaj gaDi ke na hum hote

na nazron mein kisi bhi raste ke pech-o-KHam hote

na hoti koi pabandi na hoti fikr sarhad ki

na koi rokta hum ko na lagti panw mein beDi

parindon ki tarah hote agar aazad duniya mein

nazar kyon Dalte hum par kabhi sayyaad duniya mein