bachchon ki baaten

aa.e haiñ āsmān par bādal

chhā.e haiñ āsmān par bādal

abr hī abr dekhte haiñ ham

hai barasne ko jo abhī chham-chham

aur mālūm aisā hotā hai

chhup ke ḳhurshīd jaise sotā hai

ghar ke koThe pe ek do bachche

chārpā.ī pe haiñ DaTe baiThe

boliyāñ bhāñt bhāñt haiñ un kī

mīThī mīThī haiñ bholī bhālī sī

ek bolā ki jānte ho kyā

kyā hai ye āsmān par chhāyā

ruuī ke gaale naam hai in kā

aanā aur jaanā kaam hai in kā

jab pahāḌoñ se log aate haiñ

ruuī ke gaale saath laate haiñ

kar ke achchhī tarah se in ko saaf

lambe chauḌe banāte haiñ vo lihāf

baat sach ye hai dūsrā bolā

āsmān par lagā hai ik ḳhema

hai ġhalat ye bhī tīsre ne kahā

asl meñ hai ye duudh kā dariyā

āsmāñ vaale is ko piite haiñ

is ko pī kar farishte jiite haiñ

mil ke yuuñ sab ne aisī bāteñ kiiñ

nanhe nanhoñ ne nannhī bāteñ kiiñ

dekhte dekhte huā phir kyā

mūslā-dhār meñh barasne lagā

pyāre bachche ye lāDle bachche

apne apne gharoñ ko bhaag ga.e

aae hain aasman par baadal

chhae hain aasman par baadal

abr hi abr dekhte hain hum

hai barasne ko jo abhi chham-chham

aur malum aisa hota hai

chhup ke KHurshid jaise sota hai

ghar ke koThe pe ek do bachche

chaarpai pe hain DaTe baiThe

boliyan bhant bhant hain un ki

miThi miThi hain bholi bhaali si

ek bola ki jaante ho kya

kya hai ye aasman par chhaya

rui ke gale nam hai in ka

aana aur jaana kaam hai in ka

jab pahaDon se log aate hain

rui ke gale sath late hain

kar ke achchhi tarah se in ko saf

lambe chauDe banate hain wo lihaf

baat sach ye hai dusra bola

aasman par laga hai ek KHema

hai ghalat ye bhi tisre ne kaha

asl mein hai ye dudh ka dariya

aasman wale is ko pite hain

is ko pi kar farishte jite hain

mil ke yun sab ne aisi baaten kin

nanhe nanhon ne nannhi baaten kin

dekhte dekhte hua phir kya

musla-dhaar meinh barasne laga

pyare bachche ye laDle bachche

apne apne gharon ko bhag gae