bachpan

thāme haath apne abbū kā

kamsin bachcha bholā-bhālā

ghar ke paas hī bāġhīche meñ

sub.h savere sair ko aayā

bāġhīche meñ hariyālī thī

ġhuncha ġhuncha mahak rahā thā

shāḳhoñ par gul jhuum uThte the

chheḌtā thā jab havā kā jhoñkā

dekh ke dilkash manzar bachcha

dil hī dil meñ apne ḳhush thā

maḳhmal jaisī ghaas pe us ne

motiyoñ ko jab bikhre dekhā

abbū kī phir chhoḌ ke uñglī

dauḌ ke motī chunñe pahuñchā

us ke abbū ne jab dekhā

pūchhā kyā karte ho beTā

kahne lagā vo kamsin bachcha

chuntā huuñ maiñ motī abbā

motī chuTkī se vo uThātā

paanī thā paanī ho jaatā

abbū ne ma.asūm adā par

god meñ le kar ḳhuub hī chūmā

aur ye phir bachche ko batāyā

motī qatra hai shabnam kā

chāhe jitnī koshish kar lo

haath pe lekin aa na sakegā

kaash 'ufuq' ma.asūm baneñ ham

bachpan phir lauT aa.egā apnā

thame hath apne abbu ka

kamsin bachcha bhola-bhaala

ghar ke pas hi baghiche mein

subh sawere sair ko aaya

baghiche mein hariyali thi

ghuncha ghuncha mahak raha tha

shaKHon par gul jhum uThte the

chheDta tha jab hawa ka jhonka

dekh ke dilkash manzar bachcha

dil hi dil mein apne KHush tha

maKHmal jaisi ghas pe us ne

motiyon ko jab bikhre dekha

abbu ki phir chhoD ke ungli

dauD ke moti chunne pahuncha

us ke abbu ne jab dekha

puchha kya karte ho beTa

kahne laga wo kamsin bachcha

chunta hun main moti abba

moti chuTki se wo uThata

pani tha pani ho jata

abbu ne masum ada par

god mein le kar KHub hi chuma

aur ye phir bachche ko bataya

moti qatra hai shabnam ka

chahe jitni koshish kar lo

hath pe lekin aa na sakega

kash 'ufuq' masum banen hum

bachpan phir lauT aaega apna