bad-surati ka husn

mere chehre pe thūko

tumheñ haq hai mere chehre pe thūko

ki is chehre pe rā'nā.ī

na aisī āñkheñ

jin ko dekh kar āhū-e-vahshī kā gumāñ ho

sitāroñ kī chamak in meñ

na ḳhvāboñ kī vo sarmastī

jo kahte haiñ

ḳhudā ne mushtarak bāñTe haiñ insāñ meñ

dahakte seb haiñ ye gaal

na jaañ meñ tavānā.ī

ki jis ko dekh kar sadiyoñ purāne devtāoñ kī

'azmat kā ḳhayāl aa.e

dhañsiī āñkheñ haiñ

jin meñ an-ginat sadiyoñ kī ik āsūda-hālī

aur masarrat kā

faqat ik intizār-e-rūh-farsā raqs kartā hai

siyāh rangat

ki jis kī har satr par

har-bun-e-mū par likhā hai

ādmiyyat ke sitam kī dāstāñ

us kī sharāfat aur najābat kī kahānī

tamaddun kī nishānī

ye pichkī haDDiyāñ gāloñ kī

jis kā ḳhuun

gore devtāoñ kā vo ġhāza hai

ki jis kī surḳh rangat se

jalāl un kā hai tābinda

ḳhumār-e-be-karāñ zinda

ki puurī ādmiyyat jis ke dam se

un ke aage sar-nigūñ hai

sarāsīma pareshāñ go-mago hai

siyāh rangat

ye pichkī haDDiyāñ

aur ye dhañsiī āñkheñ

me’yār-e-husn duniyā kā

muqarrar jo bhī hai us ke mutābiq

koī bhī to shai nahīñ hai

ye faqat bad-sūratī hai

thuuk do is par

magar ye jaan lo

is rang par is kaale chehre par

kahīñ insāniyat ke ḳhuun kā dhabba nahīñ hai

mere chehre pe thuko

tumhein haq hai mere chehre pe thuko

ki is chehre pe ra'nai

na aisi aankhen

jin ko dekh kar aahu-e-wahshi ka guman ho

sitaron ki chamak in mein

na KHwabon ki wo sarmasti

jo kahte hain

KHuda ne mushtarak banTe hain insan mein

dahakte seb hain ye gal

na jaan mein tawanai

ki jis ko dekh kar sadiyon purane dewtaon ki

'azmat ka KHayal aae

dhansii aankhen hain

jin mein an-ginat sadiyon ki ek aasuda-haali

aur masarrat ka

faqat ek intizar-e-ruh-farsa raqs karta hai

siyah rangat

ki jis ki har satr par

har-bun-e-mu par likha hai

aadmiyyat ke sitam ki dastan

us ki sharafat aur najabat ki kahani

tamaddun ki nishani

ye pichki haDDiyan galon ki

jis ka KHun

gore dewtaon ka wo ghaza hai

ki jis ki surKH rangat se

jalal un ka hai tabinda

KHumar-e-be-karan zinda

ki puri aadmiyyat jis ke dam se

un ke aage sar-nigun hai

sarasima pareshan go-mago hai

siyah rangat

ye pichki haDDiyan

aur ye dhansii aankhen

me’yar-e-husn duniya ka

muqarrar jo bhi hai us ke mutabiq

koi bhi to shai nahin hai

ye faqat bad-surati hai

thuk do is par

magar ye jaan lo

is rang par is kale chehre par

kahin insaniyat ke KHun ka dhabba nahin hai