baDa shahr aur tanha aadmi

december kā mahīna aur dillī kī sardī

sitāroñ kī jhilmilātī jhurmuT se pare

āsmān ke ek sunsān goshe meñ

pūnam kā TheThurtā huā koī chāñd jaise

bādaloñ meñ khātā hai mutvātir hachkole

haule haule

tanhā musāfir

aur duur tak kohre kī chādar meñ lipTī

bal khātī saḌkeñ

dhund kī ġhubār meñ khoyā huā india gate

ThanD meñ Thokareñ khātā musāfir

ḳhush nasīb hai

bādaloñ meñ ghus jaatā hai chāñd

merī christmas kī raunaqeñ phailī haiñ tamām

sitāroñ se raushan saje dhaje bāzār

lazīz khānoñ kī ḳhushbueñ jahāñ phailī haiñ har-sū

bāzār kī garm fazāoñ meñ

mai kī sarmastī meñ Duubā huā hai puure shahr kā shabāb

tanhā musāfir kī

chand roza masāfat bhī kyā shai hai yāro!

ham-vatanoñ se duur

apno se duur

jamunā taT par jaise bin māñjhī ke naav

boat club ke sard paanī meñ jaise

tairtā ruktā huā koī tanhā hubāb

tanhā musāfir sochtā hai

koī hai jis kā vo haath thaam le haule haule

koī hai jo us ke saath kuchh daur chale haule haule

dhund meñ khoī huī manzileñ

tavīl saḌkeñ

aur tanhā musāfir

jaise pūnam kā TheThurtā huā koī chāñd

bādaloñ meñ khātā hai mutvātir hachkole

haule haule

december ka mahina aur dilli ki sardi

sitaron ki jhilmilati jhurmuT se pare

aasman ke ek sunsan goshe mein

punam ka TheThurta hua koi chand jaise

baadalon mein khata hai mutwatir hachkole

haule haule

tanha musafir

aur dur tak kohre ki chadar mein lipTi

bal khati saDken

dhund ki ghubar mein khoya hua india gate

ThanD mein Thokaren khata musafir

KHush nasib hai

baadalon mein ghus jata hai chand

meri christmas ki raunaqen phaili hain tamam

sitaron se raushan saje dhaje bazar

laziz khanon ki KHushbuen jahan phaili hain har-su

bazar ki garm fazaon mein

mai ki sarmasti mein Duba hua hai pure shahr ka shabab

tanha musafir ki

chand roza masafat bhi kya shai hai yaro!

ham-watanon se dur

apno se dur

jamuna taT par jaise bin manjhi ke naw

boat club ke sard pani mein jaise

tairta rukta hua koi tanha hubab

tanha musafir sochta hai

koi hai jis ka wo hath tham le haule haule

koi hai jo us ke sath kuchh daur chale haule haule

dhund mein khoi hui manzilen

tawil saDken

aur tanha musafir

jaise punam ka TheThurta hua koi chand

baadalon mein khata hai mutwatir hachkole

haule haule