badal gae ho

badal ga.e ho

zarā se arse meñ aah kaise badal ga.e ho

tumheñ ḳhabar hai

vo haath dhartī ne khā liye haiñ

jinhoñ ne apnī hatheliyoñ meñ

hamārī ḳhātir faqat duā.eñ bharī huī thiiñ

tumheñ pata hai

vo hoñT miTTī meñ jhaḌ rahe haiñ

hamāre chehroñ pe jin ke bose juḌe hue haiñ

vo āñkheñ andhī lahad meñ shāyad bikhar chukī hoñ

vo shab ga.e tak

hamārī rāhoñ meñ apnī kirneñ bikhertī thiiñ

hamāre nam ko numūd de kar

zamīñ ko apnā vajūd de kar

kahāñ ga.e ho

zamīñ ke nam meñ hamāre paikar pighal ga.e haiñ

badal ga.e ho to aao dekho

ki ham bhī kitne badal ga.e haiñ

duā.eñ miTTī meñ gir paḌī haiñ

ḳhudā se kaisī shikāyateñ hoñ

charāġh sāñsoñ ne phūñk Daalā

havā se kaisī shikāyateñ hoñ jo ghar meñ Thahreñ to ḳhauf aa.e

ki apne paikar haiñ saa.e saa.e

safar pe nikleñ to rukte rukte

ki jaise ruḳhsat karegā koī

jo raah thakne lage to chupke se luuT aa.eñ

ki koī vāpas nahīñ bulātā

udaas hoñ to kise batā.eñ

gale se koī nahīñ lagā hai

jo ā.īnoñ se ulajh paḌeñ to

ye kaun pūchhe ki kyā huā hai

jo tum ne badlā hai ruup aisā

to ham bhī vaise nahīñ rahe haiñ

nahīñ rahe ho to ham bhī rahte haiñ yuuñ ki

jaise nahīñ rahe haiñ

badal gae ho

zara se arse mein aah kaise badal gae ho

tumhein KHabar hai

wo hath dharti ne kha liye hain

jinhon ne apni hatheliyon mein

hamari KHatir faqat duaen bhari hui thin

tumhein pata hai

wo honT miTTi mein jhaD rahe hain

hamare chehron pe jin ke bose juDe hue hain

wo aankhen andhi lahad mein shayad bikhar chuki hon

wo shab gae tak

hamari rahon mein apni kirnen bikherti thin

hamare nam ko numud de kar

zamin ko apna wajud de kar

kahan gae ho

zamin ke nam mein hamare paikar pighal gae hain

badal gae ho to aao dekho

ki hum bhi kitne badal gae hain

duaen miTTi mein gir paDi hain

KHuda se kaisi shikayaten hon

charagh sanson ne phunk Dala

hawa se kaisi shikayaten hon jo ghar mein Thahren to KHauf aae

ki apne paikar hain sae sae

safar pe niklen to rukte rukte

ki jaise ruKHsat karega koi

jo rah thakne lage to chupke se luT aaen

ki koi wapas nahin bulata

udas hon to kise bataen

gale se koi nahin laga hai

jo aainon se ulajh paDen to

ye kaun puchhe ki kya hua hai

jo tum ne badla hai rup aisa

to hum bhi waise nahin rahe hain

nahin rahe ho to hum bhi rahte hain yun ki

jaise nahin rahe hain