badal li beach safar mein

badal lī beach safar meñ hī raah aap ne bhī

ki zar kī chhāñv meñ le lī panāh aap ne bhī

mirī umiid ko ik din ujaḌ hī jaanā thā

ḳhud apnī zaat kyoñ kar lī tabāh aap ne bhī

bajā ki ishq bhī kuchh kuchh thā maslahat kā shikār

havā ke ruḳh kī tarah kī hai chaah aap ne bhī

kabhī to dhaḌkaneñ dil kī sunā.ī detī thiiñ

sunī na jag kī tarah aaj aah aap ne bhī

radīf qāfiye sab aap ke liye the mire

magar na bhuul ke kī vaah vaah aap ne bhī

sivā.e sidq mire paas aur kuchh bhī nahīñ

ḳharīd rakkhe haiñ jhūTe gavāh aap ne bhī

vafā.eñ aap kī sañgat pe naaz kartī thiiñ

sila vafā kā diyā hai karāh aap ne bhī

'rashīd' log to bastī ujaaḌ dete haiñ

kiyā hai dil ko dukhā kar gunāh aap ne bhī

badal li beach safar mein hi rah aap ne bhi

ki zar ki chhanw mein le li panah aap ne bhi

meri umid ko ek din ujaD hi jaana tha

KHud apni zat kyon kar li tabah aap ne bhi

baja ki ishq bhi kuchh kuchh tha maslahat ka shikar

hawa ke ruKH ki tarah ki hai chah aap ne bhi

kabhi to dhaDkanen dil ki sunai deti thin

suni na jag ki tarah aaj aah aap ne bhi

radif qafiye sab aap ke liye the mere

magar na bhul ke ki wah wah aap ne bhi

siwae sidq mere pas aur kuchh bhi nahin

KHarid rakkhe hain jhuTe gawah aap ne bhi

wafaen aap ki sangat pe naz karti thin

sila wafa ka diya hai karah aap ne bhi

'rashid' log to basti ujaD dete hain

kiya hai dil ko dukha kar gunah aap ne bhi