badalte mausam

vahī pyāre madhur alfāz mīThī ras-bharī bāteñ

vahī raushan rupahle din vahī mahkī huī rāteñ

vahī merā ye kahnā tum bahut hī ḳhūb-sūrat ho

tumhāre lab pe ye fiqara ki tum hī merī qismat ho

vahī merā purānā giit tum bin jī nahīñ saktā

meñ un hoñToñ kī pī kar ab koī mai pī nahīñ saktā

ye sab kuchh Thiik hai par is se jī ghabrā bhī jaatā hai

agar mausam na badle aadmī uktā bhī jaatā hai

kabhī yūñhī sahī maiñ aur ko apnā banā letā

tumhāre dil ko Thukrātā tumhārī bad-duā letā

kabhī maiñ bhī ye suntā tum baḌe hī be-muravvat ho

kabhī meñ bhī ye kahtā tum to sar-tā-pā himāqat ho

ab aao ye bhī kar dekheñ to jiine kā mazā aa.e

koī khiḌkī khule is ghar kī aur taaza havā aa.e

wahi pyare madhur alfaz miThi ras-bhari baaten

wahi raushan rupahle din wahi mahki hui raaten

wahi mera ye kahna tum bahut hi KHub-surat ho

tumhaare lab pe ye fiqara ki tum hi meri qismat ho

wahi mera purana git tum bin ji nahin sakta

mein un honTon ki pi kar ab koi mai pi nahin sakta

ye sab kuchh Thik hai par is se ji ghabra bhi jata hai

agar mausam na badle aadmi ukta bhi jata hai

kabhi yunhi sahi main aur ko apna bana leta

tumhaare dil ko Thukraata tumhaari bad-dua leta

kabhi main bhi ye sunta tum baDe hi be-murawwat ho

kabhi mein bhi ye kahta tum to sar-ta-pa himaqat ho

ab aao ye bhi kar dekhen to jine ka maza aae

koi khiDki khule is ghar ki aur taza hawa aae