badalte mausamon ki mahak

tum apne safar kī hadoñ se

bahut duur aage nikal to chuke ho

magar rāste ke manāzir

badalte hue mausamoñ kī mahak

lamha lamha pighaltī huī sā.atoñ par

kabhī tum ne thoḌī

tavajjoh bhī dī hai

yahāñ chand sachchā.iyāñ

kuchh bhayānak pahāḌoñ ke saa.e meñ

sargoshiyāñ kar rahī haiñ

vahāñ dhīre dhīre ubharte hue

surḳh sūraj kī kirnoñ kī āġhosh meñ

jal rahī haiñ

ḳhudā ke liye

dhaan ke khet meñ aadmī kī masarrat na DhūñDo

vahāñ kuchh nahīñ hai

faqat gande paanī kī har aan baḌhtī huī

nāliyāñ haiñ

ta.affun ġhalāzat se dam ghuT rahā hai

magar kār-ḳhānoñ meñ har roz

ik aadmī kī kamī ho rahī hai

bhalā aadmī se ziyāda

vafādār mazbūt nemul-badal

dar-haqīqat koī hai

ye gutthī agar yūñhī uljhī rahegī

to phir shor-o-shar meñ

izāfe kī taujīh

kyā kar sakoge

tum apne safar ki hadon se

bahut dur aage nikal to chuke ho

magar raste ke manazir

badalte hue mausamon ki mahak

lamha lamha pighalti hui saaton par

kabhi tum ne thoDi

tawajjoh bhi di hai

yahan chand sachchaiyan

kuchh bhayanak pahaDon ke sae mein

sargoshiyan kar rahi hain

wahan dhire dhire ubharte hue

surKH suraj ki kirnon ki aaghosh mein

jal rahi hain

KHuda ke liye

dhan ke khet mein aadmi ki masarrat na DhunDo

wahan kuchh nahin hai

faqat gande pani ki har aan baDhti hui

naliyan hain

taffun ghalazat se dam ghuT raha hai

magar kar-KHanon mein har roz

ek aadmi ki kami ho rahi hai

bhala aadmi se ziyaada

wafadar mazbut nemul-badal

dar-haqiqat koi hai

ye gutthi agar yunhi uljhi rahegi

to phir shor-o-shar mein

izafe ki taujih

kya kar sakoge