بدلتے موسموں کی مہک

تم اپنے سفر کی حدوں سے

بہت دور آگے نکل تو چکے ہو

مگر راستے کے مناظر

بدلتے ہوئے موسموں کی مہک

لمحہ لمحہ پگھلتی ہوئی ساعتوں پر

کبھی تم نے تھوڑی

توجہ بھی دی ہے

یہاں چند سچائیاں

کچھ بھیانک پہاڑوں کے سائے میں

سرگوشیاں کر رہی ہیں

وہاں دھیرے دھیرے ابھرتے ہوئے

سرخ سورج کی کرنوں کی آغوش میں

جل رہی ہیں

خدا کے لئے

دھان کے کھیت میں آدمی کی مسرت نہ ڈھونڈو

وہاں کچھ نہیں ہے

فقط گندے پانی کی ہر آن بڑھتی ہوئی

نالیاں ہیں

تعفن غلاظت سے دم گھٹ رہا ہے

مگر کارخانوں میں ہر روز

اک آدمی کی کمی ہو رہی ہے

بھلا آدمی سے زیادہ

وفادار مضبوط نعم البدل

در حقیقت کوئی ہے

یہ گتھی اگر یوں ہی الجھی رہے گی

تو پھر شور و شر میں

اضافے کی توجیہہ

کیا کر سکو گے