badalte namon ki dastanen

damakte sūraj kī aañkh khulne kā vaqt aayā

zamīñ ke laave ne karvaTeñ liiñ

falak ne dekhā to kaañp uTThā

ye sar-phire log kaun se haiñ havā ne pūchhā

sune hue azm ke nishān un ke zard chehroñ pe khil uThe haiñ

ye log din-rāt jāgte haiñ

ye chāhte haiñ ki zard miTTī pe surḳh phūloñ kī bārisheñ hoñ

zamīñ kī vus.at pe qarya qarya muhāfizoñ kī alag zamīñ ho

zamīñ ke be-tāj bādshāhoñ ne ham ko luuTā hai qarya qarya

hamārī jholī meñ bhiik Daalī hai

bhiik meñ vāhime diye haiñ

ye vāhime hī hamāre ghar haiñ

ham un gharoñ meñ ka.ī zamānoñ se rah rahe haiñ

gharoñ kī dīvāreñ rafta rafta simaT rahī haiñ

chhateñ dhamākoñ se phaT rahī haiñ

ham un ke malbe meñ dab rahe haiñ

qaran qaran jāñ-ba-lab rahe haiñ

phir ab to ye ahd kar liyā hai

ye ghar raheñge yā ham raheñge

kabhī na donoñ baham raheñge

zamīñ pe sailāb aane vaalā hai

us meñ poshīda vo ujālā hai

jis se sadiyoñ kī tīrgī par nashe ufuq kī nazar paḌegī

usī ujāle kī vus.atoñ meñ vo roz hai jis kī ek jumbish

har ek dīvār toḌ degī

lahū sitam kā nichhoḌ degī

vo ghar bhī miTTī pe aa raheñge

jo ghar nahīñ haiñ hamāre zindāñ haiñ

jin kī taḳhtī badaltī rahtī hai

naam un ke hazār rakkhe ga.e haiñ

phir bhī havas ke zindāñ to ek jaise haiñ

ek zanjīr hī kī kaḌiyāñ

alag alag bhī haiñ ek bhī haiñ

damakte suraj ki aankh khulne ka waqt aaya

zamin ke lawe ne karwaTen lin

falak ne dekha to kanp uTTha

ye sar-phire log kaun se hain hawa ne puchha

sune hue azm ke nishan un ke zard chehron pe khil uThe hain

ye log din-raat jagte hain

ye chahte hain ki zard miTTi pe surKH phulon ki barishen hon

zamin ki wusat pe qarya qarya muhafizon ki alag zamin ho

zamin ke be-taj baadshahon ne hum ko luTa hai qarya qarya

hamari jholi mein bhik Dali hai

bhik mein wahime diye hain

ye wahime hi hamare ghar hain

hum un gharon mein kai zamanon se rah rahe hain

gharon ki diwaren rafta rafta simaT rahi hain

chhaten dhamakon se phaT rahi hain

hum un ke malbe mein dab rahe hain

qaran qaran jaan-ba-lab rahe hain

phir ab to ye ahd kar liya hai

ye ghar rahenge ya hum rahenge

kabhi na donon baham rahenge

zamin pe sailab aane wala hai

us mein poshida wo ujala hai

jis se sadiyon ki tirgi par nashe ufuq ki nazar paDegi

usi ujale ki wusaton mein wo roz hai jis ki ek jumbish

har ek diwar toD degi

lahu sitam ka nichhoD degi

wo ghar bhi miTTi pe aa rahenge

jo ghar nahin hain hamare zindan hain

jin ki taKHti badalti rahti hai

nam un ke hazar rakkhe gae hain

phir bhi hawas ke zindan to ek jaise hain

ek zanjir hi ki kaDiyan

alag alag bhi hain ek bhi hain