baDe shahar ka KHwab

baḌā shahr baḌā shahr, baḌā shahar baḌā shahr

kisī ke liye tū bā.is-e-tamāniyat

kisī ke liye tū sāmān-e-masarrat

aur kisī ke liye hai tuu, sarāsar qahr

baḌe shahar kī chaah meñ, jaane kitne tabāh hue

kitne rūThe apnoñ se

kitne chhūTe ham-vatanoñ se

lamha lamha ulajhte rahe

sachche jhūTe sapnoñ se

baḌe shahar kā ḳhvāb liye, har pal nayā azaab liye

bhāgte rahe tamām umr, pesh-e-nazar sarāb liye

lā-hāsilī kā ḳhvāb liye

ghoḌe ke aage ghaas ho jaise

har saañs na.ī aas ho jaise

jiine kī umañg meñ

marte rahe, marte rahe

jannat paañv kī chhoḌ ke, ThanDak gaañv kī chhoḌ ke

ruuh jaltī rahī tamām umr, badan kī chitā meñ

zindagī azaab liye

baḌe shahar kā ḳhvāb liye

jalte rahe, tapte rahe, baḌe banñe ke firāq meñ

shortcut lete rahe

rātoñ-rāt, amiir banñe kī taak meñ

ham chalte rahe, chalte rahe

baḌe shahar kī chaah meñ, jaane kaise kaise gunāh kiye

yahāñ tak ki āñkheñ hamārī pathrā ga.īñ, paañv hamāre shal hue

insāniyat ham se chhin ga.ii, ham darindoñ ke misl hue

ḳhushiyoñ kī talāsh meñ, ham jīte-jī laash hue

is qadar behis-o-bad-havās hue, ham ḳhud se hī udaas hue

baḌā shahr baḌā shahr, baḌā shahr baḌā shahr

be-īmāniyoñ kī Dagar, bad-unvāniyoñ kā nagar

sach hai terī chaah meñ, jaane kitne tabāh hue

saarā gaañv apnoñ se ḳhālī ho gayā

mātamī fazā meñ, ab har taraf hasrat-o-yās hai

phir bhī baḌe shahar kī pyaas hai ki kabhī bujhtī nahīñ

ek ḳhilqat hai ki kabhī ruktī nahīñ!

ek hijrat hai ki kabhī ruktī nahīñ!

zindagī kisī se haar jaa.e, ye kabhī mumkin nahīñ

zindagī kisī se maat khā.e, ye bhī ab mumkin nahīñ

zindagī ruktī nahīñ!!

zindagī jhuktī nahīñ!!

baDa shahr baDa shahr, baDa shahar baDa shahr

kisi ke liye tu bais-e-tamaniyat

kisi ke liye tu saman-e-masarrat

aur kisi ke liye hai tu, sarasar qahr

baDe shahar ki chah mein, jaane kitne tabah hue

kitne ruThe apnon se

kitne chhuTe ham-watanon se

lamha lamha ulajhte rahe

sachche jhuTe sapnon se

baDe shahar ka KHwab liye, har pal naya azab liye

bhagte rahe tamam umr, pesh-e-nazar sarab liye

la-hasili ka KHwab liye

ghoDe ke aage ghas ho jaise

har sans nai aas ho jaise

jine ki umang mein

marte rahe, marte rahe

jannat panw ki chhoD ke, ThanDak ganw ki chhoD ke

ruh jalti rahi tamam umr, badan ki chita mein

zindagi azab liye

baDe shahar ka KHwab liye

jalte rahe, tapte rahe, baDe banne ke firaq mein

shortcut lete rahe

raaton-raat, amir banne ki tak mein

hum chalte rahe, chalte rahe

baDe shahar ki chah mein, jaane kaise kaise gunah kiye

yahan tak ki aankhen hamari pathra gain, panw hamare shal hue

insaniyat hum se chhin gai, hum darindon ke misl hue

KHushiyon ki talash mein, hum jite-ji lash hue

is qadar behis-o-bad-hawas hue, hum KHud se hi udas hue

baDa shahr baDa shahr, baDa shahr baDa shahr

be-imaniyon ki Dagar, bad-unwaniyon ka nagar

sach hai teri chah mein, jaane kitne tabah hue

sara ganw apnon se KHali ho gaya

matami faza mein, ab har taraf hasrat-o-yas hai

phir bhi baDe shahar ki pyas hai ki kabhi bujhti nahin

ek KHilqat hai ki kabhi rukti nahin!

ek hijrat hai ki kabhi rukti nahin!

zindagi kisi se haar jae, ye kabhi mumkin nahin

zindagi kisi se mat khae, ye bhi ab mumkin nahin

zindagi rukti nahin!!

zindagi jhukti nahin!!