badla

chīḳheñ sun kar dauḌā aaya

tiin baras kā thā jab maiñ ne

pahlī baar ye manzar dekhā

gaalī thappaḌ ghūñsa dhakkā

kamre meñ ik mard-e-vahshī

aurat ke nazdīk khaḌā thā

aur use bāloñ se us ke

khīñch rahā thā

farsh pe baiThī aurat rotī jaatī thī

maiñ ne dekhā

aur aurat kī jānib lapkā

mard ne aurat ke bāloñ ko

hāthoñ se āzād kiyā thā

aurat merī jānib bhāgī

ḳhauf se āñkhoñ meñ aañsū the

dahshat se peshāb bhī niklā

is se pahle mard hamārī jānib aatā

maiñ bhī us aurat ko bachāne

rote rote

us ke aage khaḌā huā yuuñ

jaise ik dīvār khaḌī ho

lekin ye dīvār bahut hī chhoTī niklī

khīñch ke bāloñ se aurat ko

mard ne kas ke Thokar maarī

aurat ko dīvār ne rokā

aur palTā ke farsh pe paTḳhā

dard se pāgal ho ga.ī aurat

māthe se favvāra uchhlā

ḳhuun se kapḌe laal hue

aise meñ hāthoñ ko uThā kar

us ne top kā āḳhirī golā aise dāġhā

allāh tujh ko ġhārat kar de

TūTeñ tere haath aur paañv

aur tujhe bas maut aa jaa.e

ḳhvāb meñ aksar ḳhuuñ kā ik

favvāra chhūTā kartā hai

us aurat kī chīḳheñ ab bhī

merā pīchhā kartī haiñ

barsoñ guzre manzar badlā

parsoñ maiñ aur merī biivī

ulajh rahe the

aisī koī baat nahīñ thī

bas itnā thā

merī dalīleñ aur tāvīleñ

ek ik kar ke

mujh ko jhūTī lagne lagī thiiñ

yak-dam ik mard-e-vahshī ne

mere andar añgḌā.ī lī

haath abhī bas uThne ko thā

yak-dam ik aurat kī chīḳheñ

āh-o-zārī ḳhūnī māthā

dhyān meñ aaya

haath kā maiñ ne mukkā taanā

aur jitnī tāqat thī mujh meñ

utnī hī shiddat se us ko

apne hī nazdīk khaḌī

dīvār pe kas ke maar diyā

chiKHen sun kar dauDa aaya

tin baras ka tha jab main ne

pahli bar ye manzar dekha

gali thappaD ghunsa dhakka

kamre mein ek mard-e-wahshi

aurat ke nazdik khaDa tha

aur use baalon se us ke

khinch raha tha

farsh pe baiThi aurat roti jati thi

main ne dekha

aur aurat ki jaanib lapka

mard ne aurat ke baalon ko

hathon se aazad kiya tha

aurat meri jaanib bhagi

KHauf se aankhon mein aansu the

dahshat se peshab bhi nikla

is se pahle mard hamari jaanib aata

main bhi us aurat ko bachane

rote rote

us ke aage khaDa hua yun

jaise ek diwar khaDi ho

lekin ye diwar bahut hi chhoTi nikli

khinch ke baalon se aurat ko

mard ne kas ke Thokar mari

aurat ko diwar ne roka

aur palTa ke farsh pe paTKHa

dard se pagal ho gai aurat

mathe se fawwara uchhla

KHun se kapDe lal hue

aise mein hathon ko uTha kar

us ne top ka aaKHiri gola aise dagha

allah tujh ko ghaarat kar de

TuTen tere hath aur panw

aur tujhe bas maut aa jae

KHwab mein aksar KHun ka ek

fawwara chhuTa karta hai

us aurat ki chiKHen ab bhi

mera pichha karti hain

barson guzre manzar badla

parson main aur meri biwi

ulajh rahe the

aisi koi baat nahin thi

bas itna tha

meri dalilen aur tawilen

ek ek kar ke

mujh ko jhuTi lagne lagi thin

yak-dam ek mard-e-wahshi ne

mere andar angDai li

hath abhi bas uThne ko tha

yak-dam ek aurat ki chiKHen

aah-o-zari KHuni matha

dhyan mein aaya

hath ka main ne mukka tana

aur jitni taqat thi mujh mein

utni hi shiddat se us ko

apne hi nazdik khaDi

diwar pe kas ke mar diya