baghdad

hasan jis shahr meñ

tū giilī miTTī se

kabhī kuuze banātā thā

tujhe is shahr meñ miTTī nahīñ

ab sar mileñge

hazāroñ ḳhasta-tan

lāshoñ se ristā ḳhuun

tere shahr kī miTTī ko

yuuñ sairāb kartā hai

ki ab jo tū kabhī

miTTī se khelegā

to har kuuza surāhī jām-o-mīnā

lahū ke rañg ke hoñge

tirī naqsh-o-nigārī

aur tire hāthoñ kī sannā.ī

na in kūzoñ ko baḳhshegī vo hairat

vo nudrat aur vo naqqāshī

jo bas terā hī hissa thī

vo is miTTī kī soñdhī tez ḳhushbū

purāne ḳhuun kī badbū meñ mil kar

aisī badlī hai

tujhe mahsūs hogā

tū kisī marghaT meñ baiThā hai

tujhe dajla kā vo shaffāf paanī yaad hai kyā

vo jis se tere kūzoñ kī ziyā thī

vo jis se pyaas bujhtī thī

tire sūkhe badan kī

vo dajla surḳh hai

ma.asūm bachchoñ ke lahū se

hasan atā yūsuf kī dukāñ ke sāmne

kal bam phaTā thā

na jaane kitne kūza-gar mare

jin ke gharoñ meñ

isī miTTī ke pyāle haiñ magar ḳhālī

taḌaptī bhuuk hai aur lab savālī

na jaane kitne kārī-gar mare

ab kaun gintā hai

hasan is shahr meñ ab koī marjīna nahīñ hai

na duniyā-zād, na hāsib karīmuddīn kā ghar hai

ajā.ib-ghar haiñ na vo dars-gāheñ

kutub-ḳhānoñ meñ lashkar so rahe haiñ

koī zinda nahīñ is shahr meñ

bas maut zinda hai

hasan tū mujh se va.ada kar

ki chāhe kuchh bhī ho jaa.e

palaT kar is shahr meñ

phir kabhī vāpas na aa.egā

hasan jis shahr mein

tu gili miTTi se

kabhi kuze banata tha

tujhe is shahr mein miTTi nahin

ab sar milenge

hazaron KHasta-tan

lashon se rista KHun

tere shahr ki miTTi ko

yun sairab karta hai

ki ab jo tu kabhi

miTTi se khelega

to har kuza surahi jam-o-mina

lahu ke rang ke honge

teri naqsh-o-nigari

aur tere hathon ki sannai

na in kuzon ko baKHshegi wo hairat

wo nudrat aur wo naqqashi

jo bas tera hi hissa thi

wo is miTTi ki sondhi tez KHushbu

purane KHun ki badbu mein mil kar

aisi badli hai

tujhe mahsus hoga

tu kisi marghaT mein baiTha hai

tujhe dajla ka wo shaffaf pani yaad hai kya

wo jis se tere kuzon ki ziya thi

wo jis se pyas bujhti thi

tere sukhe badan ki

wo dajla surKH hai

masum bachchon ke lahu se

hasan ata yusuf ki dukan ke samne

kal bam phaTa tha

na jaane kitne kuza-gar mare

jin ke gharon mein

isi miTTi ke pyale hain magar KHali

taDapti bhuk hai aur lab sawali

na jaane kitne kari-gar mare

ab kaun ginta hai

hasan is shahr mein ab koi marjina nahin hai

na duniya-zad, na hasib karimuddin ka ghar hai

ajaib-ghar hain na wo dars-gahen

kutub-KHanon mein lashkar so rahe hain

koi zinda nahin is shahr mein

bas maut zinda hai

hasan tu mujh se wada kar

ki chahe kuchh bhi ho jae

palaT kar is shahr mein

phir kabhi wapas na aaega