bagula

bagūlā kyā hai

jo ḳhāk-dar-ḳhāk shahr-dar-shahr shaḳhs-dar-shaḳhs

'aks-dar-'aks ā.ina-dar-ā.ina chal rahā hai

bahār-dīda ḳhizāñ-rasīda ye peḌ paude bikhar chuke haiñ

jo mere hamrāh chal rahe the na jaane ab vo kidhar ga.e haiñ

hamārī qaus-e-quzah ke sab rang utar chuke haiñ

bagūlā aa ke guzar gayā hai

gulāb tā-der khil chuke haiñ

mirī kahānī ke aham kirdār hazār shakleñ badal chuke haiñ

na jaane ab vo kahāñ milegā

maiñ band āñkhoñ pe apne maazī kī dhuñdlī 'ainak lagā ke dekhtā huuñ

shikasta-pā kī masāfatoñ kā ye satrah saala tavīl mausam guzar gayā hai

simaT gayā hai mire janam-din ke cake par

jaltī bujhtī sham' kī oT meñ

haa.e satrah saala tavīl mausam

bagūlā mujh meñ simaT rahā hai

maiñ apnī āñkhoñ ko mal rahā huuñ

ḳhud apne andar hī ghul rahā huuñ

samajh nahīñ aa rahā hai mujh ko ki

zindagī meñ

ye bārah patthar

girā rahā huuñ

ki chun rahā huuñ

maiñ satrah sāloñ se

tiin tinkoñ pe

chal rahā huuñ

bagula kya hai

jo KHak-dar-KHak shahr-dar-shahr shaKHs-dar-shaKHs

'aks-dar-'aks aaina-dar-aina chal raha hai

bahaar-dida KHizan-rasida ye peD paude bikhar chuke hain

jo mere hamrah chal rahe the na jaane ab wo kidhar gae hain

hamari qaus-e-quzah ke sab rang utar chuke hain

bagula aa ke guzar gaya hai

gulab ta-der khil chuke hain

meri kahani ke aham kirdar hazar shaklen badal chuke hain

na jaane ab wo kahan milega

main band aankhon pe apne mazi ki dhundli 'ainak laga ke dekhta hun

shikasta-pa ki masafaton ka ye satrah sala tawil mausam guzar gaya hai

simaT gaya hai mere janam-din ke cake par

jalti bujhti sham' ki oT mein

hae satrah sala tawil mausam

bagula mujh mein simaT raha hai

main apni aankhon ko mal raha hun

KHud apne andar hi ghul raha hun

samajh nahin aa raha hai mujh ko ki

zindagi mein

ye barah patthar

gira raha hun

ki chun raha hun

main satrah salon se

tin tinkon pe

chal raha hun