bagula

juun kā taptā mahīna timtimātā āftāb

Dhal chukā hai din ke sāñche meñ jahannam kā shabāb

dopahar ik ātish-e-sayyāl barsātī huī

sīna-e-kohsār meñ laavā sā pighlātī huī

vo jhulastī ghaas vo pagDanDiyāñ pāmāl sī

nahr ke lab ḳhushk se zarroñ kī āñkheñ laal sī

chilchilātī dhuup meñ maidān ko chaḌhtā buḳhār

aah ke mānind uThtā halkā halkā sā ġhubār

dekh vo maidān meñ hai ik bagūlā be-qarār

āñdhiyoñ kī god meñ ho jaise muflis kā mazār

chaak par jaise banā.e jā rahe hoñ zalzale

yā junūñ tai kar rahā ho gardishoñ ke marhale

Dhālnā chāhe zamīñ jis tarah koī āsmāñ

jaise chakkar khā ke nikle top ke muñh se dhuāñ

mil rahā ho jis tarah josh-e-baġhāvat ko farāġh

jañg chhiḌ jaane pe jaise ek leader kā dimāġh

ḳhashmgīñ abrū pe Daale ḳhāk-ālūda naqāb

jañgaloñ kī raah se aa.e safīr-e-inqalāb

yuuñ bagūle meñ haiñ tapte surḳh zarre be-qarār

jis tarah aflās ke dil meñ baġhāvat ke sharār

kas qadar āzād hai ye rūh-e-sahrā ye bhī dekh

kas tarah zarroñ meñ hai tūfān barpā ye bhī dekh

uTh bagūle kī tarah maidān meñ gaatā nikal

zindagī kī ruuh har zarre meñ dauḌātā nikal

jun ka tapta mahina timtimata aaftab

Dhal chuka hai din ke sanche mein jahannam ka shabab

dopahar ek aatish-e-sayyal barsati hui

sina-e-kohsar mein lawa sa pighlati hui

wo jhulasti ghas wo pagDanDiyan pamal si

nahr ke lab KHushk se zarron ki aankhen lal si

chilchilati dhup mein maidan ko chaDhta buKHar

aah ke manind uThta halka halka sa ghubar

dekh wo maidan mein hai ek bagula be-qarar

aandhiyon ki god mein ho jaise muflis ka mazar

chaak par jaise banae ja rahe hon zalzale

ya junun tai kar raha ho gardishon ke marhale

Dhaalna chahe zamin jis tarah koi aasman

jaise chakkar kha ke nikle top ke munh se dhuan

mil raha ho jis tarah josh-e-baghawat ko faragh

jang chhiD jaane pe jaise ek leader ka dimagh

KHashmgin abru pe Dale KHak-aluda naqab

jangalon ki rah se aae safir-e-inqalab

yun bagule mein hain tapte surKH zarre be-qarar

jis tarah aflas ke dil mein baghawat ke sharar

kas qadar aazad hai ye ruh-e-sahra ye bhi dekh

kas tarah zarron mein hai tufan barpa ye bhi dekh

uTh bagule ki tarah maidan mein gata nikal

zindagi ki ruh har zarre mein dauData nikal