bahane DhunDta hun main

bahāne DhūñDhtā huuñ maiñ

ki daftar se zarā jaldī hī uTh jā.ūñ

(mujhe kyā dostoñ se jā ke milnā hai?)

nahīñ

ik dūsre se ham sabhī tañg aa.e baiThe haiñ

(mujhe kyā ghar pahuñchnā hai?)

nahīñ hargiz nahīñ

ulTā

bahāne DhūñDhtā huuñ maiñ

ki jitnā ho sake utnā hī maiñ ghar der se pahuñchūñ

(mujhe hāsil nahīñ kyā biivī bachchoñ kī mohabbat?)

hai, magar phir bhī na jaane kyuuñ

bahāne DhūñDhtā huuñ maiñ

unheñ kuchh arsa ko maiñ bhej duuñ bāhar

kahāñ lekin

nahīñ ma.alūm kuchh mujh ko

to phir kyā merī shāmoñ meñ

ta.alluq kī hañsī aur chaap shāmil hai

nahīñ to

phir mujhe kyā khaa.e jaatā hai

ki maiñ bañdh kar kahīñ bhī rah nahīñ saktā

bahāne DhūñDhtā huuñ

toḌne ko kaun sā bandhan

bahane DhunDhta hun main

ki daftar se zara jaldi hi uTh jaun

(mujhe kya doston se ja ke milna hai?)

nahin

ek dusre se hum sabhi tang aae baiThe hain

(mujhe kya ghar pahunchna hai?)

nahin hargiz nahin

ulTa

bahane DhunDhta hun main

ki jitna ho sake utna hi main ghar der se pahunchun

(mujhe hasil nahin kya biwi bachchon ki mohabbat?)

hai, magar phir bhi na jaane kyun

bahane DhunDhta hun main

unhen kuchh arsa ko main bhej dun bahar

kahan lekin

nahin malum kuchh mujh ko

to phir kya meri shamon mein

talluq ki hansi aur chap shamil hai

nahin to

phir mujhe kya khae jata hai

ki main bandh kar kahin bhi rah nahin sakta

bahane DhunDhta hun

toDne ko kaun sa bandhan