bahaar ban ke chali aa ki ja rahi hai bahaar

faroġh-e-māh se kyā jagmagā rahī hai bahār

guloñ meñ nuur kī sham.eñ jalā rahī hai bahār

zamīn-e-bāġh ko jannat banā rahī hai bahār

sharāb-e-husn ke sāġhar pilā rahī hai bahār

bahār ban ke chalī aa ki jā rahī hai bahār

chaman bahisht hai mauj-e-sharāb zamzam-e-kaif

baras rahī hai gul-e-mudda.ā pe shabnam-e-kaif

yahī nashāt ke din haiñ yahī hai ālam-e-kaif

ki zarra-zarra hai bazm-e-jahāñ kā mahram-e-kaif

bahār ban ke chalī aa ki jā rahī hai bahār

faroġh-e-rang se gulzār sho.ala-zār bhī haiñ

fazā.eñ husn kī nik.hat se mushk-bār bhī haiñ

diloñ meñ dard ke andāz be-qarār bhī haiñ

masarratoñ ke ye din jān-e-rozgār bhī haiñ

bahār ban ke chalī aa ki jā rahī hai bahār

rabāb-e-isq haiñ larzāñ hai ik tarāna-e-nāz

jamī huī hai abhī mahfil-e-shabāna-e-nāz

abhī zabān-e-mohabbat pe hai fasāna-e-nāz

ye tujh se kaun kahe ai nigār-ḳhāna-e-nāz

bahār ban ke chalī aa ki jā rahī hai bahār

ga.ī bahār zabānoñ pe naam baaqī hai

ḳhayāl kī tapish-e-nā-tamām baaqī hai

mai-e-nashāt kā bas ek jaam baaqī hai

faroġh-e-māh kī bas ek shaam baaqī hai

bahār ban ke chalī aa ki jā rahī hai bahār

farogh-e-mah se kya jagmaga rahi hai bahaar

gulon mein nur ki shamen jala rahi hai bahaar

zamin-e-bagh ko jannat bana rahi hai bahaar

sharab-e-husn ke saghar pila rahi hai bahaar

bahaar ban ke chali aa ki ja rahi hai bahaar

chaman bahisht hai mauj-e-sharab zamzam-e-kaif

baras rahi hai gul-e-muddaa pe shabnam-e-kaif

yahi nashat ke din hain yahi hai aalam-e-kaif

ki zarra-zarra hai bazm-e-jahan ka mahram-e-kaif

bahaar ban ke chali aa ki ja rahi hai bahaar

farogh-e-rang se gulzar shoala-zar bhi hain

fazaen husn ki nikhat se mushk-bar bhi hain

dilon mein dard ke andaz be-qarar bhi hain

masarraton ke ye din jaan-e-rozgar bhi hain

bahaar ban ke chali aa ki ja rahi hai bahaar

rabab-e-isq hain larzan hai ek tarana-e-naz

jami hui hai abhi mahfil-e-shabana-e-naz

abhi zaban-e-mohabbat pe hai fasana-e-naz

ye tujh se kaun kahe ai nigar-KHana-e-naz

bahaar ban ke chali aa ki ja rahi hai bahaar

gai bahaar zabanon pe nam baqi hai

KHayal ki tapish-e-na-tamam baqi hai

mai-e-nashat ka bas ek jam baqi hai

farogh-e-mah ki bas ek sham baqi hai

bahaar ban ke chali aa ki ja rahi hai bahaar