bahaar-e-shabab

mohtasib ke hosh uḌāne kā zamāna aa gayā

be-jhijak piine pilāne kā zamāna aa gayā

jām-e-ātish-zer-e-pā kī oT le kar sāqiyā

botaloñ meñ Duub jaane kā zamāna aa gayā

kā.enāt-e-hosh par kaalī ghaTā.eñ chhā ga.iiñ

yaum-e-shab-tābī manāne kā zamāna aa gayā

phir ḳhayāl-e-āriz-e-tābāñ ne liiñ añgḌā.iyāñ

raat ko phir din banāne kā zamāna aa gayā

mast phāgun ke jilau meñ sar-phire din aa ga.e

aql ko pāgal banāne kā zamāna aa gayā

ye ghaTā.eñ ye bahāreñ aur ye tanhā.iyāñ

phir kisī ke yaad aane kā zamāna aa gayā

mere gulzār-e-tasavvur meñ bahāreñ aa ga.iiñ

un ko phūloñ meñ basāne kā zamāna aa gayā

mehrbāñ ab dosh par āñchal Thahar saktā nahīñ

valvaloñ ke sar uThāne kā zamāna aa gayā

be-sabab hī chīñ-ba-jabīñ hone kī ghaḌiyāñ aa ga.iiñ

be-irāda muskurāne kā zamāna aa gayā

josh par aa.ī javānī khil uThe āñchal ke phuul

aag paanī meñ lagāne kā zamāna aa gayā

un kī zulf-e-ambarīñ ke sāya-e-pur-nūr meñ

niiñd kī qismat jagāne kā zamāna aa gayā

shāhidān-e-sho.ala-rū ko le uḌā ġhāze kā shauq

aag par paanī chaḌhāne kā zamāna aa gayā

rūThne vaale ba-pās-e-vaqt-o-ādāb-e-shabāb

pichhlī bāteñ bhuul jaane kā zamāna aa gayā

dāġh-e-dil 'fārūq' dikhlā kar sar-e-bazm-e-jamāl

in ko ā.īna banāne kā zamāna aa gayā

mohtasib ke hosh uDane ka zamana aa gaya

be-jhijak pine pilane ka zamana aa gaya

jam-e-atish-zer-e-pa ki oT le kar saqiya

botalon mein Dub jaane ka zamana aa gaya

kaenat-e-hosh par kali ghaTaen chha gain

yaum-e-shab-tabi manane ka zamana aa gaya

phir KHayal-e-ariz-e-taban ne lin angDaiyan

raat ko phir din banane ka zamana aa gaya

mast phagun ke jilau mein sar-phire din aa gae

aql ko pagal banane ka zamana aa gaya

ye ghaTaen ye bahaaren aur ye tanhaiyan

phir kisi ke yaad aane ka zamana aa gaya

mere gulzar-e-tasawwur mein bahaaren aa gain

un ko phulon mein basane ka zamana aa gaya

mehrban ab dosh par aanchal Thahar sakta nahin

walwalon ke sar uThane ka zamana aa gaya

be-sabab hi chin-ba-jabin hone ki ghaDiyan aa gain

be-irada muskurane ka zamana aa gaya

josh par aai jawani khil uThe aanchal ke phul

aag pani mein lagane ka zamana aa gaya

un ki zulf-e-ambarin ke saya-e-pur-nur mein

nind ki qismat jagane ka zamana aa gaya

shahidan-e-shoala-ru ko le uDa ghaze ka shauq

aag par pani chaDhane ka zamana aa gaya

ruThne wale ba-pas-e-waqt-o-adab-e-shabab

pichhli baaten bhul jaane ka zamana aa gaya

dagh-e-dil 'faruq' dikhla kar sar-e-bazm-e-jamal

in ko aaina banane ka zamana aa gaya