bahaar

fasl-e-gul aa.ī chalīñ ThanDī havā.eñ dil-fazā

gosha gosha ban gayā hai baaġh kā jannat-numā

sehn-e-gulshan kī fazā.eñ phir mo.attar ho ga.iiñ

tā.eroñ ke sun ke naġhme ḳhud bhī shāḳheñ so ga.iiñ

ye ravish par phuul haiñ yā husn-e-fitrat jalva-gar

zarra-zarra le rahā hai baaġh kā jis se asar

haañ magar ik dil hai merā jo hai is se be-ḳhabar

kaif-parvar kis qadar haiñ shaam kī dilchaspiyāñ

jannat-e-ahl-e-nazar haiñ sub.h kī rangīniyāñ

raat terī josh-e-kaifiyāt se labrez hai

āshiqoñ ko chāñdnī terī junūñ-añgez hai

aah ye ayyām-e-gul bhī kis qadar haiñ ḳhush-gavār

ya.anī har zarre se duniyā ke ḳhushī hai āshkār

hai magar merā dil-e-sad-chāk ab tak be-qarār

vo nasīm-e-sub.h-gāhī vo tuyūr-e-ḳhush-navā

vo ravish phūloñ bharī aur kaif-āvar vo havā

bulbuloñ ke shor se māmūr hai sehn-e-chaman

ban gayā hai gosha gosha baaġh kā ik anjuman

chashm-e-nargis josh-e-gul se mast hai maḳhmūr hai

dekh kar jis ko dil-e-ġham-dīda bhī masrūr hai

haañ magar merā dil-e-nāshād ġham se chuur hai

vo tabassum terā ai doshīza-e-fasl-e-bahār

bhar diyā phūloñ se tū ne aa ke saarā kohsār

kar diyā faiz-e-qadam ne tere sahrā ko chaman

terī nairangī banī zīnat-fazā-e-anjuman

tū na hotī to na hotī raunaq-e-bazm-e-jahāñ

tū na hotī to na hote husn ke jalve ayaañ

tū ne 'sāqib' ko dikhā.e husn-e-fitrat ke nishāñ

fasl-e-gul aai chalin ThanDi hawaen dil-faza

gosha gosha ban gaya hai bagh ka jannat-numa

sehn-e-gulshan ki fazaen phir moattar ho gain

taeron ke sun ke naghme KHud bhi shaKHen so gain

ye rawish par phul hain ya husn-e-fitrat jalwa-gar

zarra-zarra le raha hai bagh ka jis se asar

han magar ek dil hai mera jo hai is se be-KHabar

kaif-parwar kis qadar hain sham ki dilchaspiyan

jannat-e-ahl-e-nazar hain subh ki ranginiyan

raat teri josh-e-kaifiyat se labrez hai

aashiqon ko chandni teri junun-angez hai

aah ye ayyam-e-gul bhi kis qadar hain KHush-gawar

yani har zarre se duniya ke KHushi hai aashkar

hai magar mera dil-e-sad-chaak ab tak be-qarar

wo nasim-e-subh-gahi wo tuyur-e-KHush-nawa

wo rawish phulon bhari aur kaif-awar wo hawa

bulbulon ke shor se mamur hai sehn-e-chaman

ban gaya hai gosha gosha bagh ka ek anjuman

chashm-e-nargis josh-e-gul se mast hai maKHmur hai

dekh kar jis ko dil-e-gham-dida bhi masrur hai

han magar mera dil-e-nashad gham se chur hai

wo tabassum tera ai doshiza-e-fasl-e-bahaar

bhar diya phulon se tu ne aa ke sara kohsar

kar diya faiz-e-qadam ne tere sahra ko chaman

teri nairangi bani zinat-faza-e-anjuman

tu na hoti to na hoti raunaq-e-bazm-e-jahan

tu na hoti to na hote husn ke jalwe ayan

tu ne 'saqib' ko dikhae husn-e-fitrat ke nishan