bahaar ka aaKHiri phul

zamāne ne supurd-e-ḳhāk tere kar diye sāthī

na un kī pattiyāñ baaqī na un meñ rang-o-bū baaqī

kabhī ke terī mahfil se mohabbat ke ratan nikle

sitam hai is gulistāñ se tire sab ham-vatan nikle

judā.ī se azīzoñ kī hai be-raunaq jahāñ terā

mohabbat ke fasānoñ se hai ab ḳhālī makāñ terā

na koī ham-navā terā takallum ho to kis se ho

na koī chāhne vaalā tabassum ho to kis se ho

na tere dard meñ koī tire nazdīk aatā hai

na terī be-kasī par ab koī aañsū bahātā hai

tire is baaġh ke taḳhtoñ pe hasrat sī barastī hai

parī-ḳhāna jo thā ik din vo ab ujḌī sī bastī hai

batā ai phuul is jiine meñ phir tujh ko mazā kyā hai

jo sach pūchho to is jiine se mar jaanā hī achchhā hai

judā kar ke tujhe Daalī se ab nīche girātā huuñ

haqīqat ye hai maiñ tujh ko azīzoñ se milātā huuñ

zamane ne supurd-e-KHak tere kar diye sathi

na un ki pattiyan baqi na un mein rang-o-bu baqi

kabhi ke teri mahfil se mohabbat ke ratan nikle

sitam hai is gulistan se tere sab ham-watan nikle

judai se azizon ki hai be-raunaq jahan tera

mohabbat ke fasanon se hai ab KHali makan tera

na koi ham-nawa tera takallum ho to kis se ho

na koi chahne wala tabassum ho to kis se ho

na tere dard mein koi tere nazdik aata hai

na teri be-kasi par ab koi aansu bahata hai

tere is bagh ke taKHton pe hasrat si barasti hai

pari-KHana jo tha ek din wo ab ujDi si basti hai

bata ai phul is jine mein phir tujh ko maza kya hai

jo sach puchho to is jine se mar jaana hi achchha hai

juda kar ke tujhe Dali se ab niche giraata hun

haqiqat ye hai main tujh ko azizon se milata hun