bahaar

yuuñ mire dil se kheltī hai bahār

jaise tāroñ kī dil-nashīñ chashmak

jis tarah chāñd kī hasīñ kirneñ

nīm-shab gosha-e-gulistāñ meñ

pattī pattī pe naaz se kheleñ

yuuñ mire dil se kheltī hai bahār

jis tarah qurb-e-husn kā ehsās

jaise mahbūb kī nigāh-e-jamīl

dil meñ āñkhoñ kī raah se utre

aur ho jaa.e ruuh meñ tahlīl

yuuñ mire dil se kheltī hai bahār

jaise ulfat ke be-sadā naġhme

jis tarah ġham kī muzmahil tāneñ

dard-e-afsurdagī se uktā kar

sāz-e-hastī se ḳhud-ba-ḳhud ubhreñ

yuuñ mire dil se kheltī hai bahār

jaise āñchal kisī hasīna kā

haule haule uḌā rahī ho nasīm

jis tarah aks-e-hūr se khele

ḳhuld meñ mauj-e-kausar-o-tasnīm

yun mere dil se khelti hai bahaar

jaise taron ki dil-nashin chashmak

jis tarah chand ki hasin kirnen

nim-shab gosha-e-gulistan mein

patti patti pe naz se khelen

yun mere dil se khelti hai bahaar

jis tarah qurb-e-husn ka ehsas

jaise mahbub ki nigah-e-jamil

dil mein aankhon ki rah se utre

aur ho jae ruh mein tahlil

yun mere dil se khelti hai bahaar

jaise ulfat ke be-sada naghme

jis tarah gham ki muzmahil tanen

dard-e-afsurdagi se ukta kar

saz-e-hasti se KHud-ba-KHud ubhren

yun mere dil se khelti hai bahaar

jaise aanchal kisi hasina ka

haule haule uDa rahi ho nasim

jis tarah aks-e-hur se khele

KHuld mein mauj-e-kausar-o-tasnim