bahut laDte ho tum

bahut laḌte ho tum

maiñ bhī tunuk-tābī meñ

ḳhāsī fard huuñ

so ḳhuub jamtī hai baham apnī

maiñ mushkil rāstoñ kī gard

palkoñ par sañbhāle aa.ī huuñ

tum tak

mire nazdīk ke har mantaqe meñ

tum bhī

apne bāloñ kī chāñdī pe itrāte

parāganda mizājī meñ guñdhe

ukhḌe hue tāroñ kī

pagDanDī ke

dil meñ ghūmte ho

mohabbat kī bhaḌak

lafzoñ meñ kam

āñkhoñ kī halchal meñ

ziyāda le ke phirtī huuñ

mire nokīle lahje kī

chubhan ke us taraf dil kī

bahut hī reshmī had tak

tumhārī aañkh jaatī hai

ta.alluq meñ ravādārī kā nam

jaane kahāñ se aatā hai

aur aa ke ham donoñ kī

āvezish kī sab

muñh-zoriyāñ zanjīr kartā hai

suno sab guftugū ke silsile

merī tumhārī ḳhāmushī kī

bhiig se sarsabz rahte haiñ

mirī nazmoñ kā markaz

aaj ke pal kī

sajal duniyā meñ bas tum ho

tumhī se barsar-e-paikār huuñ

aur be-tahāsha multafit bhī

tum ta'āruz ke gudāzoñ meñ

mujhe dekho

maiñ apne dil ke tausan ko

bahut sarpaT bhagātī

ḳhaak ke tūfāñ jagātī

jis gulistāñ kī tamannā kī

Dagar par jā rahī huuñ

us kī had par tum

us kī had par tum

kahīñ ik peḌ ke pahlū meñ

dil ban kar dhaḌakte ho

kahīñ fitrat ke

pech-o-tāb meñ zanjīr ho

aur dhuup kī yalġhār meñ

mere liye chhāñv kā

ik nā-muḳhtatim ehsās bante ho

bahut hī duur se bas

tum hī mujh ko saaf sunte ho

bahut laDte ho tum

main bhi tunuk-tabi mein

KHasi fard hun

so KHub jamti hai baham apni

main mushkil raston ki gard

palkon par sanbhaale aai hun

tum tak

mere nazdik ke har mantaqe mein

tum bhi

apne baalon ki chandi pe itraate

paraganda mizaji mein gundhe

ukhDe hue taron ki

pagDanDi ke

dil mein ghumte ho

mohabbat ki bhaDak

lafzon mein kam

aankhon ki halchal mein

ziyaada le ke phirti hun

mere nokile lahje ki

chubhan ke us taraf dil ki

bahut hi reshmi had tak

tumhaari aankh jati hai

talluq mein rawadari ka nam

jaane kahan se aata hai

aur aa ke hum donon ki

aawezish ki sab

munh-zoriyan zanjir karta hai

suno sab guftugu ke silsile

meri tumhaari KHamushi ki

bhig se sarsabz rahte hain

meri nazmon ka markaz

aaj ke pal ki

sajal duniya mein bas tum ho

tumhi se barsar-e-paikar hun

aur be-tahasha multafit bhi

tum ta'aruz ke gudazon mein

mujhe dekho

main apne dil ke tausan ko

bahut sarpaT bhagati

KHak ke tufan jagati

jis gulistan ki tamanna ki

Dagar par ja rahi hun

us ki had par tum

us ki had par tum

kahin ek peD ke pahlu mein

dil ban kar dhaDakte ho

kahin fitrat ke

pech-o-tab mein zanjir ho

aur dhup ki yalghaar mein

mere liye chhanw ka

ek na-muKHtatim ehsas bante ho

bahut hi dur se bas

tum hi mujh ko saf sunte ho