bahut shor hai

bahut shor hai

mātahat laḌkiyāñ mere zaanū pe sajda kareñ

ḳhauf-ālūdgī shor-o-shar kī pazīrā.ī meñ ro paḌe

ye zamīneñ siyah-nasl ghoḌoñ kī āvāz se jāgtī haiñ

chashm-e-shab-kor har chāñdnī-rāt meñ ek jalsa karegī

zamīñ fīl-e-be-zor kī tarah paTtī rahī hai

unhī sā.atoñ meñ ba-shart-e-sikandar koī aa.ine ke barābar milegā

vo hañstī hai aur sāya-e-āfiyat ke tasavvur ko majrūh kartī hai

use fīl-e-be-zor ke sāmne Daal do

us ke chehre ko TuuTe hue aa.ine se musaḳhḳhar karo

vo hañstī hai aur girya-e-nīm-shab ke samundar pe apnā alam kholtī hai

haath jal makḌiyoñ se kurede hue

paañv meñ ghaas lipTī huī

āfiyat hai samundar kī bahtī huī ghaas meñ

āfiyat hai samundar kī āvāz meñ

shor hai

shor meñ āfiyat

mātahat laḌkiyo mere zaanū pe sajda karo

ye zamīneñ siyah-nasl ghoḌoñ kī āvāz se jāgtī haiñ

bahut shor hai

matahat laDkiyan mere zanu pe sajda karen

KHauf-aludgi shor-o-shar ki pazirai mein ro paDe

ye zaminen siyah-nasl ghoDon ki aawaz se jagti hain

chashm-e-shab-kor har chandni-raat mein ek jalsa karegi

zamin fil-e-be-zor ki tarah paTti rahi hai

unhi saaton mein ba-shart-e-sikandar koi aaine ke barabar milega

wo hansti hai aur saya-e-afiyat ke tasawwur ko majruh karti hai

use fil-e-be-zor ke samne Dal do

us ke chehre ko TuTe hue aaine se musaKHKHar karo

wo hansti hai aur girya-e-nim-shab ke samundar pe apna alam kholti hai

hath jal makDiyon se kurede hue

panw mein ghas lipTi hui

aafiyat hai samundar ki bahti hui ghas mein

aafiyat hai samundar ki aawaz mein

shor hai

shor mein aafiyat

matahat laDkiyo mere zanu pe sajda karo

ye zaminen siyah-nasl ghoDon ki aawaz se jagti hain