bainal-aqwami manzar-nama

khilāḌī rū-ba-rū baiThe haiñ

apnī chaal chalte haiñ

bichhā.ī hai siyāsat kī bisāt aur is pe lāsheñ haiñ

kahīñ maqtūl shaiḳhān-e-haram ke

kahīñ par shaah ke kushte

kahīñ malika ke murde haiñ

kahīñ jamhūriyat ke adh-mūe zaḳhmī karāhe jā rahe haiñ

khilāḌī ta.aziyat ke rañg ko chehre pe malte haiñ

baḌī tahzīb aur shafqat se lāshoñ ko uThāte haiñ

unheñ mālūm hai ye apne mohre kab badalne haiñ

pyādoñ ko kahāñ par gardaneñ apnī kaTānī haiñ

kahāñ par kis tarah ik dūsre ko maat denī hai

bahut arse se saare match hī ab fix hote haiñ

khilaDi ru-ba-ru baiThe hain

apni chaal chalte hain

bichhai hai siyasat ki bisat aur is pe lashen hain

kahin maqtul shaiKHan-e-haram ke

kahin par shah ke kushte

kahin malika ke murde hain

kahin jamhuriyat ke adh-mue zaKHmi karahe ja rahe hain

khilaDi taziyat ke rang ko chehre pe malte hain

baDi tahzib aur shafqat se lashon ko uThate hain

unhen malum hai ye apne mohre kab badalne hain

pyaadon ko kahan par gardanen apni kaTani hain

kahan par kis tarah ek dusre ko mat deni hai

bahut arse se sare match hi ab fix hote hain