بین الاقوامی منظر نامہ

کھلاڑی رو بہ رو بیٹھے ہیں

اپنی چال چلتے ہیں

بچھائی ہے سیاست کی بساط اور اس پہ لاشیں ہیں

کہیں مقتول شیخان حرم کے

کہیں پر شاہ کے کشتے

کہیں ملکہ کے مردے ہیں

کہیں جمہوریت کے ادھ موئے زخمی کراہے جا رہے ہیں

کھلاڑی تعزیت کے رنگ کو چہرے پہ ملتے ہیں

بڑی تہذیب اور شفقت سے لاشوں کو اٹھاتے ہیں

انہیں معلوم ہے یہ اپنے مہرے کب بدلنے ہیں

پیادوں کو کہاں پر گردنیں اپنی کٹانی ہیں

کہاں پر کس طرح اک دوسرے کو مات دینی ہے

بہت عرصے سے سارے میچ ہی اب فکس ہوتے ہیں