baKHtawar

terī talab meñ merī hoñToñ kī ḳhushk-sālī ne

kitne mausamoñ ke sitam faqat is liye sahe taaki tujhe ḳhabar ho terī talab meñ

kin qurbāniyoñ se guzar kar aanā hai

ai baḳht-e-bahār tujhe ġhair mustaqil chāhne vaalā ḳhvāb-o-ḳhvāhish kī vādiyoñ meñ

ye bhūlā huā hai

tere chehre kā ātish-fishāñ

tere surḳh-o-safed siine kī garmāhaT se be-qābū huā phirtā hai

tujhe kin falsafoñ kī 'ādat thī

tū kin bevaqūfoñ meñ phañs ga.ī hai

tū vo shahkār zehn thī jo gulāb aur ḳhushbū ke darmiyān se metaphor alag kar detī thī

aaj tujh se kapḌoñ kī almārī set nahīñ hotī

ai baḳht-e-'ālam-e-ashyā mujhe yaad hai maiñ ne jab hosh kā shahd chakkhā thā

terā zikr 'azīm hastiyoñ meñ muqaddas bastiyoñ meñ matrūk sahīfoñ meñ aur paiġhambaroñ ke paak

darīchoñ meñ hotā thā

terī mohabbat meñ ġharq tere ahrām par utarte hue ka.ī dīn-dāroñ kī dīniyāt meñ bal aa.e jaate the

aur terī chāhat meñ ūñche gumbadoñ se nikaltī niilī raushnī ke pairavkār ke hukm par

TuuTe tāroñ kī dhaat se tere kangan banvā.e jaate the

mujhe yaad hai vo din terī ḳhudā.ī ke din the

aaj tū apnī kalā.iyoñ meñ kāñch kī chūḌiyāñ pahan kar

apne rutbe kā mazāq banā rahī hai

tū kis shaan kī aulād thī tū kahāñ kī rahne vaalī

tere liye to zindagī ras-bhare añgūroñ pe chahal-qadmī thī

ye kis 'azāb meñ ghūñT ghūñT mar rahī hai

tū ek bevaqūf ke

bachche paidā kar rahī hai

teri talab mein meri honTon ki KHushk-sali ne

kitne mausamon ke sitam faqat is liye sahe taki tujhe KHabar ho teri talab mein

kin qurbaniyon se guzar kar aana hai

ai baKHt-e-bahaar tujhe ghair mustaqil chahne wala KHwab-o-KHwahish ki wadiyon mein

ye bhula hua hai

tere chehre ka aatish-fishan

tere surKH-o-safed sine ki garmahaT se be-qabu hua phirta hai

tujhe kin falsafon ki 'adat thi

tu kin bewaqufon mein phans gai hai

tu wo shahkar zehn thi jo gulab aur KHushbu ke darmiyan se metaphor alag kar deti thi

aaj tujh se kapDon ki almari set nahin hoti

ai baKHt-e-'alam-e-ashya mujhe yaad hai main ne jab hosh ka shahd chakkha tha

tera zikr 'azim hastiyon mein muqaddas bastiyon mein matruk sahifon mein aur paighambaron ke pak

darichon mein hota tha

teri mohabbat mein gharq tere ahram par utarte hue kai din-daron ki diniyat mein bal aae jate the

aur teri chahat mein unche gumbadon se nikalti nili raushni ke pairawkar ke hukm par

TuTe taron ki dhat se tere kangan banwae jate the

mujhe yaad hai wo din teri KHudai ke din the

aaj tu apni kalaiyon mein kanch ki chuDiyan pahan kar

apne rutbe ka mazaq bana rahi hai

tu kis shan ki aulad thi tu kahan ki rahne wali

tere liye to zindagi ras-bhare anguron pe chahal-qadmi thi

ye kis 'azab mein ghunT ghunT mar rahi hai

tu ek bewaquf ke

bachche paida kar rahi hai