ban-bas

mere shahr ke saare raste band haiñ logo

maiñ is shahr kā naġhma-gar

jo do ik mausam ġhurbat ke dukh jhel ke aayā

taaki apne ghar kī dīvāroñ se

apnī thakī huī aur tarsī huī

āñkheñ sahlā.ūñ

apne darvāze ke utarte roġhan ko

apne ashkoñ se saiqal kar luuñ

apne chaman ke jale hue paudoñ

aur gard-ālūd daraḳhtoñ kī

murda shāḳhoñ par bain karūñ

har mahjūr sutūn ko itnā TuuT ke chūmūñ

mere laboñ ke ḳhuun se

un ke naqsh-o-nigār sabhī jī uTheñ

galī ke logoñ ko itnā dekhūñ

itnā dekhūñ

merī āñkheñ

barsoñ kī tarsī huī āñkheñ

chehroñ ke āñgan ban jaa.eñ

phir maiñ apnā saaz uThā.ūñ

āñsuoñ aur muskānoñ se jhilmil jhilmil

nazmeñ ġhazleñ giit sunā.ūñ

apne pyāroñ

dard ke māroñ kā darmāñ ban jā.ūñ

lekin mere shahr ke saare rastoñ par

ab baaḌ hai lohe ke kāñToñ kī

shah darvāze par kuchh pahre-dār khaḌe haiñ

jo mujh se aur mujh jaise dil vāloñ kī

pahchān se aarī

mere saaz se

sañgīnoñ se baat kareñ

maiñ un se kahtā huuñ

dekho

maiñ is shahr kā naġhma-gar huuñ

barsoñ ba.ad kaḌī rāhoñ kī

saarī aziyyat jhel ke ab vāpas aayā huuñ

us miTTī kī ḳhātir

jis kī ḳhushbueñ

duniyā bhar kī do-shīzāoñ ke jismoñ kī mahkoñ se

aur saare jahāñ ke

sabhī gulāboñ se

baḌh kar hai

mujh ko shahr meñ

mere shahr meñ jaane do

lekin tane hue nezoñ ne

mere jism ko yuuñ barmāyā

mere saaz ko yuuñ rezāyā

merā humaktā ḳhuun aur mere sisakte naġhme

shah-darvāze kī dahlīz se

riste riste

shahr ke andar jā pahuñche haiñ

aur maiñ apne jism kā malba

saaz kā lāsha

apne shahr ke shah-darvāze

kī dahlīz pe chhoḌ ke

phir anjāne shahroñ kī shahrāhoñ par

majbūr-e-safar huuñ

jin ko taj kar ghar aayā thā

jin ko taj kar ghar aayā thā

mere shahr ke sare raste band hain logo

main is shahr ka naghma-gar

jo do ek mausam ghurbat ke dukh jhel ke aaya

taki apne ghar ki diwaron se

apni thaki hui aur tarsi hui

aankhen sahlaun

apne darwaze ke utarte roghan ko

apne ashkon se saiqal kar lun

apne chaman ke jale hue paudon

aur gard-alud daraKHton ki

murda shaKHon par bain karun

har mahjur sutun ko itna TuT ke chumun

mere labon ke KHun se

un ke naqsh-o-nigar sabhi ji uThen

gali ke logon ko itna dekhun

itna dekhun

meri aankhen

barson ki tarsi hui aankhen

chehron ke aangan ban jaen

phir main apna saz uThaun

aansuon aur muskanon se jhilmil jhilmil

nazmen ghazlen git sunaun

apne pyaron

dard ke maron ka darman ban jaun

lekin mere shahr ke sare raston par

ab baD hai lohe ke kanTon ki

shah darwaze par kuchh pahre-dar khaDe hain

jo mujh se aur mujh jaise dil walon ki

pahchan se aari

mere saz se

sanginon se baat karen

main un se kahta hun

dekho

main is shahr ka naghma-gar hun

barson baad kaDi rahon ki

sari aziyyat jhel ke ab wapas aaya hun

us miTTi ki KHatir

jis ki KHushbuen

duniya bhar ki do-shizaon ke jismon ki mahkon se

aur sare jahan ke

sabhi gulabon se

baDh kar hai

mujh ko shahr mein

mere shahr mein jaane do

lekin tane hue nezon ne

mere jism ko yun barmaya

mere saz ko yun rezaya

mera humakta KHun aur mere sisakte naghme

shah-darwaze ki dahliz se

riste riste

shahr ke andar ja pahunche hain

aur main apne jism ka malba

saz ka lasha

apne shahr ke shah-darwaze

ki dahliz pe chhoD ke

phir anjaane shahron ki shahrahon par

majbur-e-safar hun

jin ko taj kar ghar aaya tha

jin ko taj kar ghar aaya tha