banaras

bhaTaktī huī vaqt kī ātmā.eñ

tire ghaaT ke pattharoñ kī zabāñ se

yugoñ kī sadāoñ kī sūrat ubhar kar

ghulī jā rahī hai bujhe pāniyoñ meñ

tirī saañs kī shāh-rāhoñ par phūTī

vahī tañg galiyāñ, vo galiyoñ meñ galiyāñ!

ki jaise ragoñ kā bune jaal koī

jahāñ laakh bhaTko, na koī safar ho

safar fāsla hai, safar marhala hai

yahīñ par hayāt aur yahīñ par fanā hai

isī marhale se isii, fāsle se

ik imkān ban kar jo bahtā hai paanī

sabhī apnī apnī qadāmat ke āsār

dhīre se us meñ bahāne lage haiñ

sabhī apnī falak-bos tanhā.ī

tire ufuq par sajāne lage haiñ

koī raag ḳhāmosh gaane lage haiñ

muqaddas bayābān, jismoñ ke markaz!

tirī ruuh ke be-karāñ sard, kone meñ

sadiyāñ ġhalāzat kiye jā rahī haiñ

banāras tirī sab mujarrad adā.eñ

hasīñ maut pā kar jiye jā rahī hai!

bhaTakti hui waqt ki aatmaen

tere ghaT ke pattharon ki zaban se

yugon ki sadaon ki surat ubhar kar

ghuli ja rahi hai bujhe paniyon mein

teri sans ki shah-rahon par phuTi

wahi tang galiyan, wo galiyon mein galiyan!

ki jaise ragon ka bune jal koi

jahan lakh bhaTko, na koi safar ho

safar fasla hai, safar marhala hai

yahin par hayat aur yahin par fana hai

isi marhale se isi, fasle se

ek imkan ban kar jo bahta hai pani

sabhi apni apni qadamat ke aasar

dhire se us mein bahane lage hain

sabhi apni falak-bos tanhai

tere ufuq par sajaane lage hain

koi rag KHamosh gane lage hain

muqaddas bayaban, jismon ke markaz!

teri ruh ke be-karan sard, kone mein

sadiyan ghalazat kiye ja rahi hain

banaras teri sab mujarrad adaen

hasin maut pa kar jiye ja rahi hai!