band dariche

band darīche

jab khulte haiñ

yādoñ kī halkī sī lahr

dil kī chaukhaT par

halke halke dastak detī hai

jaane kyoñ ye man kī kaayā

chanchal chhāyā ban jaatī hai

ek ik naqsh ubhar kar

miT miT jaatā hai

miT miT kar phir

ubhrā jaatā hai

ye sab tasvīreñ haiñ maazī kī

ab in kā rang uḌā jaatā hai

ik vaqt thā

maiñ ne in meñ

dil kā ḳhuun bharā thā

phir bhī jaane kyoñ

ab bhī ye tasvīreñ

jab bhī ubhar kar

miT jaatī haiñ

ḳhuun ke aañsū

rotā huuñ

ehsās ye hotā hai mujh ko

jaise ye tasvīreñ ab sūkhī haiñ

in kī kaayā phīkī hai

maiñ bhī in se kahtā huuñ

jab jab khologe

tum band darīche

sūkhne na do ye tasvīreñ

chāhte ho to aañsū le lo

dil kā dard

ḳhuun kā qatra qatra le lo

ye sab merī yādeñ haiñ

in ke bal par jiitā huuñ

jī kar phir mar jaatā huuñ

aisā lagtā hai

jaise nanhā bachcha

rasta bhūlā ho

aur bhūlī-bhaTkī rāh-guzar se

ghar ko vāpas aatā ho

lekin raah na paatā ho

band dariche

jab khulte hain

yaadon ki halki si lahr

dil ki chaukhaT par

halke halke dastak deti hai

jaane kyon ye man ki kaya

chanchal chhaya ban jati hai

ek ek naqsh ubhar kar

miT miT jata hai

miT miT kar phir

ubhra jata hai

ye sab taswiren hain mazi ki

ab in ka rang uDa jata hai

ek waqt tha

main ne in mein

dil ka KHun bhara tha

phir bhi jaane kyon

ab bhi ye taswiren

jab bhi ubhar kar

miT jati hain

KHun ke aansu

rota hun

ehsas ye hota hai mujh ko

jaise ye taswiren ab sukhi hain

in ki kaya phiki hai

main bhi in se kahta hun

jab jab khologe

tum band dariche

sukhne na do ye taswiren

chahte ho to aansu le lo

dil ka dard

KHun ka qatra qatra le lo

ye sab meri yaaden hain

in ke bal par jita hun

ji kar phir mar jata hun

aisa lagta hai

jaise nanha bachcha

rasta bhula ho

aur bhuli-bhaTki rah-guzar se

ghar ko wapas aata ho

lekin rah na pata ho