banjara

maiñ banjāra

vaqt ke kitne shahroñ se guzrā huuñ

lekin

vaqt ke is ik shahr se jaate jaate muḌ ke dekh rahā huuñ

soch rahā huuñ

tum se merā ye naatā bhī TuuT rahā hai

tum ne mujh ko chhoḌā thā jis shahr meñ aa kar

vaqt kā ab vo shahr bhī mujh se chhūT rahā hai

mujh ko vidā.a karne aa.e haiñ

is nagrī ke saare baasī

vo saare din

jin ke kañdhe par sotī hai

ab bhī tumhārī zulf kī ḳhushbū

saare lamhe

jin ke māthe par raushan

ab bhī tumhāre lams kā Tiikā

nam āñkhoñ se

gum-sum mujh ko dekh rahe haiñ

mujh ko in ke dukh kā patā hai

in ko mere ġham kī ḳhabar hai

lekin mujh ko hukm-e-safar hai

jaanā hogā

vaqt ke agle shahr mujhe ab jaanā hogā

vaqt ke agle shahr ke saare bāshinde

sab din sab rāteñ

jo tum se nā-vāqif hoñge

vo kab merī baat suneñge

mujh se kaheñge

jaao apnī raah lo raahī

ham ko kitne kaam paḌe haiñ

jo biitī so biit ga.ī

ab vo bāteñ kyuuñ dohrāte ho

kañdhe par ye jholī rakkhe

kyuuñ phirte ho kyā paate ho

maiñ be-chāra

ik banjāra

āvāra phirte phirte jab thak jā.ūñgā

tanhā.ī ke Tiile par jā kar baiThūñgā

phir jaise pahchān ke mujh ko

ik banjāra jaan ke mujh ko

vaqt ke agle shahr ke saare nanhe-munne bhole lamhe

nañge paañv

dauḌe dauḌe bhāge bhāge aa jā.eñge

mujh ko gher ke baiTheñge

aur mujh se kaheñge

kyuuñ banjāre

tum to vaqt ke kitne shahroñ se guzre ho

un shahroñ kī koī kahānī hameñ sunāo

un se kahūñgā

nanhe lamho!

ek thī raanī

sun ke kahānī

saare nanhe lamhe

ġhamgīñ ho kar mujh se ye pūchheñge

tum kyuuñ in ke shahr na aa.iiñ

lekin un ko bahlā lūñgā

un se kahūñgā

ye mat pūchho

āñkheñ mūñdo

aur ye socho

tum hotīñ to kaisā hotā

tum ye kahtīñ

tum vo kahtīñ

tum is baat pe hairāñ hotīñ

tum us baat pe kitnī hañstīñ

tum hotīñ to aisā hotā

tum hotīñ to vaisā hotā

dhīre dhīre

mere saare nanhe lamhe

so jā.eñge

aur maiñ

phir haule se uTh kar

apnī yādoñ kī jholī kañdhe par rakh kar

phir chal dūñgā

vaqt ke agle shahr kī jānib

nanhe lamhoñ ko samjhāne

bhūle lamhoñ ko bahlāne

yahī kahānī phir dohrāne

tum hotīñ to aisā hotā

tum hotīñ to vaisā hotā

main banjara

waqt ke kitne shahron se guzra hun

lekin

waqt ke is ek shahr se jate jate muD ke dekh raha hun

soch raha hun

tum se mera ye nata bhi TuT raha hai

tum ne mujh ko chhoDa tha jis shahr mein aa kar

waqt ka ab wo shahr bhi mujh se chhuT raha hai

mujh ko widaa karne aae hain

is nagri ke sare basi

wo sare din

jin ke kandhe par soti hai

ab bhi tumhaari zulf ki KHushbu

sare lamhe

jin ke mathe par raushan

ab bhi tumhaare lams ka Tika

nam aankhon se

gum-sum mujh ko dekh rahe hain

mujh ko in ke dukh ka pata hai

in ko mere gham ki KHabar hai

lekin mujh ko hukm-e-safar hai

jaana hoga

waqt ke agle shahr mujhe ab jaana hoga

waqt ke agle shahr ke sare bashinde

sab din sab raaten

jo tum se na-waqif honge

wo kab meri baat sunenge

mujh se kahenge

jao apni rah lo rahi

hum ko kitne kaam paDe hain

jo biti so bit gai

ab wo baaten kyun dohraate ho

kandhe par ye jholi rakkhe

kyun phirte ho kya pate ho

main be-chaara

ek banjara

aawara phirte phirte jab thak jaunga

tanhai ke Tile par ja kar baiThunga

phir jaise pahchan ke mujh ko

ek banjara jaan ke mujh ko

waqt ke agle shahr ke sare nanhe-munne bhole lamhe

nange panw

dauDe dauDe bhage bhage aa jaenge

mujh ko gher ke baiThenge

aur mujh se kahenge

kyun banjare

tum to waqt ke kitne shahron se guzre ho

un shahron ki koi kahani hamein sunao

un se kahunga

nanhe lamho!

ek thi rani

sun ke kahani

sare nanhe lamhe

ghamgin ho kar mujh se ye puchhenge

tum kyun in ke shahr na aain

lekin un ko bahla lunga

un se kahunga

ye mat puchho

aankhen mundo

aur ye socho

tum hotin to kaisa hota

tum ye kahtin

tum wo kahtin

tum is baat pe hairan hotin

tum us baat pe kitni hanstin

tum hotin to aisa hota

tum hotin to waisa hota

dhire dhire

mere sare nanhe lamhe

so jaenge

aur main

phir haule se uTh kar

apni yaadon ki jholi kandhe par rakh kar

phir chal dunga

waqt ke agle shahr ki jaanib

nanhe lamhon ko samjhane

bhule lamhon ko bahlane

yahi kahani phir dohrane

tum hotin to aisa hota

tum hotin to waisa hota