barabar ka taul

usūl-e-mehr-o-ulfat se na vo ġhāfil na maiñ ġhāfil

dabistān-e-mohabbat meñ na vo jāhil na maiñ jāhil

maiñ apne zauq se vāqif vo apne husn se vāqif

ba-hadd-e-sūrat-o-sīrat na vo saa.il na maiñ saa.il

vafā ke mo'jize kā e'tirāf un ko bhī mujh ko bhī

tasanno' kī karāmat ke vo qaa.il haiñ na maiñ qaa.il

mohabbat un kī lā-sānī sadāqat merī lā-fānī

haqīqat hī haqīqat hai na vo bātil na maiñ bātil

ḳhushāmad iltijā minnat samājat ārzū-mandī

zavāhir meñ zavāhir kī kareñ ham ḳhaak pābandī

maqām-e-ins-o-‘irfāñ meñ raheñ āzād ham donoñ

misālan nit na.ī rasmeñ kareñ ījād ham donoñ

vo rūTheñ maiñ manā.ūñ vo hañseñ maiñ qahqaha mārūñ

vo jaa.eñ maiñ bulā.ūñ yuuñ raheñ dil-shād ham donoñ

vo chup sādheñ maiñ chup sādhūñ na vo chheḌeñ na maiñ chheḌūñ

jahān-e-kaif ko yuuñ bhī kareñ ābād ham donoñ

mohabbat zindābād ab tak shagufta dil haiñ jis Dhab se

isī Dhab se raheñ nā-vāqif-e-fariyād ham donoñ

tafavvuq hai payām-e-jang ham donoñ premī haiñ

'uqābī jang-nāme se na vo raazī na ḳhush huuñ maiñ

maiñ un ke naaz uThā.ūñ aur merā dil vo bahlā.eñ

ġhurūr-angez shāhāna na maiñ gā.ūñ na vo gaa.eñ

akele phuul chun leñ baaġh meñ to ḳhair chun bhī leñ

magar tanhā pa-e-gul-gasht maiñ jā.ūñ na vo jaa.eñ

gila karnā to jaa.ez hī nahīñ hai farz hai lekin

zabāñ par shikva-e-bejā na maiñ lā.ūñ na vo laa.eñ

unheñ saugand maiñ duuñ husn kī vo mujh ko ulfat kī

qasam lailā-o-majnūñ kī na maiñ khā.ūñ na vo khā.eñ

ba-ā.īn-e-ḳhirad maiñ bhī vafā kā dam bharūñ vo bhī

ġharaz qānūn-e-fitrat kā adab maiñ bhī karūñ vo bhī

usul-e-mehr-o-ulfat se na wo ghafil na main ghafil

dabistan-e-mohabbat mein na wo jahil na main jahil

main apne zauq se waqif wo apne husn se waqif

ba-hadd-e-surat-o-sirat na wo sail na main sail

wafa ke mo'jize ka e'tiraf un ko bhi mujh ko bhi

tasanno' ki karamat ke wo qail hain na main qail

mohabbat un ki la-sani sadaqat meri la-fani

haqiqat hi haqiqat hai na wo baatil na main baatil

KHushamad iltija minnat samajat aarzu-mandi

zawahir mein zawahir ki karen hum KHak pabandi

maqam-e-ins-o-‘irfan mein rahen aazad hum donon

misalan nit nai rasmen karen ijad hum donon

wo ruThen main manaun wo hansen main qahqaha marun

wo jaen main bulaun yun rahen dil-shad hum donon

wo chup sadhen main chup sadhun na wo chheDen na main chheDun

jahan-e-kaif ko yun bhi karen aabaad hum donon

mohabbat zindabaad ab tak shagufta dil hain jis Dhab se

isi Dhab se rahen na-waqif-e-fariyaad hum donon

tafawwuq hai payam-e-jang hum donon premi hain

'uqabi jang-name se na wo raazi na KHush hun main

main un ke naz uThaun aur mera dil wo bahlaen

ghurur-angez shahana na main gaun na wo gaen

akele phul chun len bagh mein to KHair chun bhi len

magar tanha pa-e-gul-gasht main jaun na wo jaen

gila karna to jaez hi nahin hai farz hai lekin

zaban par shikwa-e-beja na main laun na wo laen

unhen saugand main dun husn ki wo mujh ko ulfat ki

qasam laila-o-majnun ki na main khaun na wo khaen

ba-ain-e-KHirad main bhi wafa ka dam bharun wo bhi

gharaz qanun-e-fitrat ka adab main bhi karun wo bhi